У адкрытым акцыянерным таварыстве «Новая Друць», што ў Бялыніцкім раёне, прыступілі да ўборкі ўраджаю жэньшэню. Выпадак у нашай краіне ўнікальны. «Корань жыцця» прыходзіцца выкопваць рукамі – лапатай можна абсекчы яго «рукі» і «ногі». Карэнішча жэньшэня нагадвае фігурку чалавека. Такое падабенства – адзін з параметраў высокай якасці лекавай расліны. Першай уборачнай у гаспадарцы папярэднічала сем гадоў карпатлівай працы і догляду.

З выгляду прымітыўны парнік, а на самай справе – імітацыя таёжнага клімату. Бо арэал расліны – гэта Далёкі Усход, Кітай, Тыбет і Алтай. Таму ад нашага гарачага лета і прамых сонечных прамянёў ратуюць драўляныя дошкі з прасветам на столі. За кошт такой канструкцыі тэмпература ў жэньшэнарыі заўсёды на пару градусаў ніжэйшае, чым на вуліцы.

Працаўніца ААТ Рэня Лазаронак даглядае экзатычную расліну з моманту пасяўной:

– Я б не сказала, што жэньшэнь капрызнейшы, скажам, за нашу бульбу. Галоўнае – прапалоць своечасова, лішняя вільгаць сама сцякае ўніз па канаўках: для гэтага парнік спецыяльна будаваўся на горцы, каб стварыць натуральны ўхіл. У глебы адмысловая рэцэптура «таёжная» – з даданнем рачнога пяску і вермігумусу.

Гэтая ўборачная – эксперыментальная. Увесь ураджай на трыццаці сотках, паводле папярэдніх разлікаў аграномаў, павінен скласці да 50 кілаграмаў. Гэтай восенню збяруць толькі 5 кг – мінімум для атрымання сертыфіката якасці. Дырэктар ААТ «Новая Друць» Анатоль Драздоў пробны ўраджай называе маркетынгавай разведкай:

– Да наступнай восені мы разлічваем мець на руках кантракты з фармацэўтычнымі кампаніямі і лікёра-гарэлачнымі заводамі. Гэта асноўныя спажыўцы лекавай сыравіны. Яшчэ да атрымання сертыфіката нашы маркетолагі прамацваюць патэнцыйныя рынкі збыту. Аб цане казаць рана: яна можа даходзіць да тысячы рублёў за кілаграм. Рэнтабельнасць культуры з сусветнай практыкі – каля 70 працэнтаў. Улетку да нас прыязджалі бізнесмены з Кітая. Вельмі зацікавіліся нашым жэньшэнем, бо ў іх традыцыйнай медыцыне гэта лекавая расліна лічыцца ледзь не панацэяй. Калі збыт пойдзе, будзем пашыраць пасяўныя плошчы. Насенне цяпер у нас уласнае, адпрацавалі тэхналогію. Вопыт пераймалі ў фермера з Бранскай вобласці: яго бізнес квітнее. У любым выпадку ў нас у краіне мы ўжо на крок наперадзе канкурэнтаў, бо збіраць першы ўраджай можна не раней чым праз 6-8 гадоў пасля пачатку вырошчвання. Гаспадарка ў нас шматпрофільная: жывёлагадоўля, бульба, яблыневы сад. Вядома, жэньшэнь ў аб’ёме сельгаспрадукцыі – кропля ў моры. Але хто ведае, магчыма, яна стане «залатой».

СБ