У горадзе на Бярэзіне аб’яўлены конкурс жывых скульптур «Застылыя ў часе». Пра гэта паведамілі ў Палацы мастацтваў Бабруйска, які з’яўляецца арганізатарам творчага спаборніцтва.

Прыняць удзел у конкурсе прапануецца ўсім жадаючым, любым творчым аб’яднанням і групам. Жывыя скульптуры могуць быць рухомымі (мімы), музычнымі, якія спяваюць, адлюстроўваць самыя розныя тэмы, герояў літаратурных твораў або фільмаў, персанажаў з гісторыі горада.

Сярод крытэрыяў для вызначэння найлепшых работ – арыгінальнасць задумы і каларыстычнае рашэнне, выразнасць раскрыцця вобраза і акцёрская гульня з гледачамі. Дазваляецца выкарыстоўваць любы рэквізіт. Галоўнае – прыдумаць вобраз, увасобіць ідэю ў жыццё і здолець замерці на 40 хвілін на вачах гледачоў, паколькінайлепшыя скульптуры 29 чэрвеня прымуць удзел у выставе, прымеркаванай да Дня горада Бабруйска.

Заяўкі на ўдзел прымаюцца да 15 чэрвеня ўключна ў арганізацыйна-метадычным аддзеле ДУК «Палац мастацтваў г. Бабруйска»(вул. Ульянаўская, 35/31, каб. 221). Даведкі і дадатковая інфармацыя па тэл: (225) 72-60-97; адрас электроннай пошты – diomo@tut.by (з пазнакай «Заяўка на конкурс»).