Двое шасцігадовых дзяцей загінула пры пажары ў Бабруйску, паведамілі ў Магілёўскім абласным упраўленні МНС.

Паведамленне аб пажары ў дзевяціпавярховым доме паступіла 27 мая ў 2.41. Калі ратавальнікі адчынілі металічныя дзверы, у кватэры на восьмым паверсе было моцнае задымленне. На падлозе ў спальні звяно газадымаахоўнай службы МНС заўважыла шасцігадовых хлопчыка і дзяўчынку. Дзяцей перадалі медыкам, аднак выратаваць іх не ўдалося.

Маці на момант пажару дома адсутнічала. Старэйшае дзіця знаходзілася ў бабулі. Прычыны і абставіны пажару высвятляюцца.