Прэзідэнт Беларусі Аляксандр Лукашэнка 7 чэрвеня падпісаў указ №226 «Аб адкрыцці спецыяльных рахункаў», паведамілі ў прэс-службе кіраўніка дзяржавы.

Дакументам прадугледжваецца адкрыццё спецрахунку прадпрыемствамі цэментнай прамысловасці і падраднымі арганізацыямі, якія маюць запазычанасць перад імі.

Грашовыя сродкі, залічаныя на гэтыя рахункі, маюць мэтавае прызначэнне і будуць накіроўвацца падраднымі арганізацыямі на разлікі з прадпрыемствамі цэментнай прамысловасці за атрыманую прадукцыю, адкрытымі акцыянернымі таварыствамі «Беларускі цэментны завод»,

«Краснасельскбудматэрыялы» і «Крычаўцэментнашыфер» – на пакрыццё плацяжоў, зробленых з рэспубліканскага бюджэту па крэдытах Экспартна-імпартнага банка Кітая, а таксама на выплату працэнтаў па прыцягнутых інвестыцыйных крэдытах беларускіх банкаў.

Указ падпісаны ў мэтах стварэння ўмоў для скарачэння запазычанасці перад арганізацыямі цэментнай галіны за адгружаную імі прадукцыю і своечасовага забеспячэння гэтымі арганізацыямі вяртання крэдытаў.

БЕЛТА