У Беларусі колькасць наведванняў жанчынамі акушэра-гінеколага пры нармальным праходжанні цяжарнасці скарацілася амаль у два разы,

паведаміла сёння журналістам начальнік упраўлення арганізацыі медыцынскай дапамогі Міністэрства аховы здароўя.

Міністэрства аховы здароўя ў гэтым годзе прыняло новы клінічны пратакол па ахове здароўя маці, у якім з улікам айчыннага і міжнароднага вопыту зменены падыходы да вядзення фізіялагічнай цяжарнасці. «Мы значна скарацілі наведванне акушэра-гінеколага пры цяжарнасці, якая працякае фізіялагічна нармальна, добрым здароўі жанчыны, практычна ў два разы – з 16 да 9. Адпаведна аптымізавалі колькасць даследаванняў. Нашы клінічныя пратаколы прааналізаваны і адобраны экспертамі СААЗ з пазіцыі доказнай медыцыны і мінімальнага ўмяшальніцтва ў фізіялагічны працэс», – адзначыла Алена Богдан.

Акрамя таго, распрацавана новая інструкцыя і клінічныя пратаколы па бясплоддзі з акцэнтам на мужчынскае бясплоддзе, адзначыла прадстаўнік Міністэрства аховы здароўя. Гэта адпавядае новай канцэпцыі планавання сям’і.

Многае робіцца для захавання кожнай цяжарнасці. Гэта перш за ўсё перадабортнае псіхалагічнае кансультаванне жанчын. Дзякуючы гэтай працы, арганізаванай Міністэрствам аховы здароўя сумесна з грамадскімі арганізацыямі, царквой, амаль 2 тыс. дзяцей змаглі з’явіцца на свет. Станоўчы эфект па захаванні жаночага здароўя даюць укаранёныя ў Беларусі скрынінгі анкалагічных захворванняў. У якасці прыкладу Алена Богдан прывяла праект па скрынінгу раку шыйкі маткі ў трох раёнах Гомельскай вобласці, забруджаных пасля аварыі на Чарнобыльскай АЭС.

Працуюць медыкі таксама з ВІЧ-інфіцыраванымі жанчынамі. Антырэтравірусная тэрапія праводзіцца на дзяржаўныя сродкі. Сумесна з ЮНІСЕФ працягваюцца праекты па прафілактыцы знешніх прычын інваліднасці і ранняй смяротнасці дзяцей. Адкрыта 10 рэсурсных цэнтраў, у якіх будучыя мамы і таты навучаюцца бяспечным паводзінам дома. Падобныя цэнтры, у адпаведнасці з пазіцыяй Міністэрства аховы здароўя, неабходна адкрыць у кожнай вобласці рэспублікі – у гарадах з колькасцю насельніцтва больш за 100 тыс. Адпаведная работа працягнецца ў 2018 годзе.

Для пашырэння магчымасцяў самарэалізацыі жанчын, у якіх дзеці маюць асаблівасці развіцця, падрыхтавана новая канцэпцыя па міжведамаснай працы і адпаведны ўказ Міністэрства аховы здароўя, узгоднены з іншымі ведамствамі, па рабоце цэнтраў ранняга ўмяшальніцтва. У іх перш за ўсё будзе аказвацца псіхалагічная падтрымка мамам і ўсім сем’ям у выпадку прыроджанай або набытай інваліднасці дзіцяці.

Алена Богдан звярнула ўвагу, што з мая 2017 года пачаў функцыянаваць партал «Здаровыя людзі», дзе ёсць шмат раздзелаў, якія дапамогуць жанчынам правесці саматэставанне і знайсці адказы на многія пытанні ўласнага здароўя, палавога выхавання сваіх дзяцей і іншыя.

БЕЛТА