У Чавусах ў полі паблізу вуліцы 60 гадоў СССР праводзіліся дарожныя земляныя работы, падчас якіх выявіліся каштоўныя гістарычныя знаходкі. З зямлі дасталі скелетаваныя астанкі чалавека, фрагменты абмундзіравання, сапёрную рыдлёўку, ружжо часоў Вялікай Айчыннай вайны.

Непадалёк знайшлі 120-міліметровую мінамётную міну, 45-міліметровы артылерыйскі снарад і дзве гранаты часоў ВАВ. Усе боепрыпасы абясшкоджаны сапёрна-піратэхнічнай групай вайсковай часткі 72471.

«Па гэтым факце праводзіцца праверка, знаходкі вывучаюць эксперты, – заўважыла афіцыйны прадстаўнік упраўлення Следчага камітэта па Магілёўскай вобласці Аксана Салянюк. – Як мяркуецца, астанкі належаць загінуламу тут падчас бою чырвонаармейцу, іх перададуць у ваенкамат для ўстанаўлення імені героя і ўрачыстага перапахавання. Пошукавікі таксама правядуць дадатковыя раскопкі на месцы знаходжання астанкаў і амуніцыі. Не выключана, што адшукаюцца баявыя ўзнагароды, медальёны і іншыя гістарычныя каштоўнасці».

СБ