Вызначаны першачарговыя супрацьаварыйныя працы ў касцёле былога калегіума езуітаў XVII стагоддзя ў Мсціславе, паведаміла на прэс-канферэнцыі намеснік начальніка ўпраўлення па ахове гісторыка-культурнай спадчыны Міністэрства культуры Наталля Хвір.

У былым езуіцкім касцёле абрынулася частка сцяны, якая трымала нагрузку зводу будынка. Пасля гэтага мясцовы дабрачынны фонд «Адраджэнне гісторыка-архітэктурных помнікаў г. Мсціслава» пачаў збор сродкаў, таксама быў адкрыты разліковы рахунак, інфармацыя аб якім размяшчалася на сайтах Мсціслаўскага, Кіраўскага, Крычаўскага, Бабруйскага, Асіповіцкага райвыканкама, Міністэрства культуры.

Паводле слоў Наталлі Хвір, Міністэрства культуры аказала метадычную дапамогу, а таксама падрыхтавала пералік першачарговых мер на аб’екце, неабходных для тэрміновага выканання. У першую чаргу неабходна правесці ўручную частковы дэмантаж даху над разбураным участкам, дэмантаж аварыйных участкаў зводаў сцен, выдаленне цэглы мура, якая выпадае, разбор завалаў пасля дэмантажу, дадатковыя абследаванні для вызначэння мер па ўзмацненні канструкцый касцёла. Прапановы перададзены ў Магілёўскі абласны выканаўчы камітэт.

Наталля Хвір адзначыла, што супрацоўнікі ведамства таксама ўнеслі свой уклад, сабраўшы сродкі для накіравання на супрацьаварыйныя працы ў касцёле.

БЕЛТА