У Магілёўскай вобласці 22-26 кастрычніка праводзіцца Тыдзень дзіцячай бяспекі. Пра гэта карэспандэнту сайта паведаміла інспектар ААіП ДАІ УУС аблвыканкама Юлія Халамеева.

«Лічаныя дні засталіся да канца першай вучэбнай чвэрці ў школах і гімназіях. На носе – восеньскія канікулы, – падкрэсліла субяседніца. – У дзяцей з’явіцца шмат вольнага часу, большую частку якога яны, калі пашанцуе з надвор’ем, правядуць на вуліцы. Менавіта таму ў канікулярны час традыцыйна абвастраецца праблема дзіцячага дарожнага траўматызму. Юныя ўдзельнікі руху ў сілу свайго ўзросту не разумеюць усёй ступені небяспекі на дарозе. Вось чаму важны бацькоўскі кантроль і своечасовае пажаданне захоўваць правілы бяспечных паводзін».

З пачатку 2018 года на тэрыторыі Магілёўскай вобласці зарэгістравана 42 дарожна-транспартныя здарэнні з удзелам непаўналетніх, у якіх двое дзяцей загінулі і 43 атрымалі траўмы.

«Без сумнення, асноўная роля ў гарантаванні дзіцячай дарожнай бяспекі належыць кіроўцам, – падкрэсліла Юлія Халамеева. – Паважайце знак «дзеці». Заўсёды, незалежна ад таго, бачныя дзеці або не, зніжайце хуткасць. Кіруйцеся прынцыпам: чым горшаябачнасць – тым ніжэйшая хуткасць. Пры праездзе па дваровых тэрыторыях улічвайце звычку дзятвы выбягаць з-за машын. І памятайце, што пры пад’ездзе да пешаходных пераходаў неабходна загадзя зніжаць хуткасць і заўсёды саступаць дарогу пешаходам».

Увосень на вуліцах яшчэ шмат непаўналетніх аматараў велатранспарту. Таму варта нагадаць школьніку аб няўхільным выкананні ПДР пры руху на веласіпедзе. «Калі набылі двухколавы транспарт для дзіцяці, паклапаціцеся, каб ён быў пазначаны ў цемры спецыяльнымі ліхтарамі. І не забывайце, што дзецям ва ўзросце да 14-ці гадоў забаронена без суправаджэння паўналетняй асобы кіраваць веласіпедам на дарозе, акрамя пешаходных і жылых зон, тратуараў веласіпедных і пешаходных дарожак», – склала Юлія Халамеева.

Не варта забываць пра бяспеку дзяцей-пасажыраў, бо нярэдка дзіця ў аўтамабілі становіцца закладнікам халатнасці кіроўцы. Перавозка дзяцей у легкавым аўтамабілі, абсталяваным рамянямі бяспекі, павінна ажыццяўляцца з выкарыстаннем:

– дзіцячых утрымлівальных прылад, якія адпавядаюць вазе і росту дзіцяці – для дзяцей ва ўзросце да 5-ці гадоў;

– дзіцячых утрымлівальных прылад, якія адпавядаюць вазе і росту дзіцяці, іншых сродкаў (бустэраў, спецыяльных падушак для сядзення, дадатковых сядзенняў), якія дазваляюць бяспечна прышпіліць дзіця з дапамогай рамянёў бяспекі, прадугледжаных канструкцыяй транспартнага сродку, – для дзяцей ва ўзросце ад 5 да 12-ці гадоў.

Дапускаецца перавозіць дзяцей да 12 гадоў без спецыяльных прылад, калі рост дзіцяці большы за 150 см, а таксама ў таксі.

Забараняецца перавозка дзяцей на пярэднім сядзенні аўтамабіля з выкарыстаннем дзіцячых утрымлівальных прылад, якія адпавядаюць вазе і росту дзіцяці, спінка якіх разгорнута да лабавога шкла транспартнага сродку, калі пярэдняе сядзенне мае падушку бяспекі, за выключэннем выпадку, калі механізм франтальнай падушкі бяспекі адключаны.

Забаронена перавозка дзіцяці ва ўзросце да 12-ці гадоў на каленях у паўналетняга пасажыра, прышпіленага рамянём бяспекі на заднім сядзенні.

За невыкарыстанне дзіцячай ўтрымлівальнай прылады ў выпадках, калі яна абавязковая, прадугледжаны штраф у памеры да 4 базавых велічынь. Паўторнае парушэнне гэтага правіла на працягу года прадугледжвае штраф у памеры ад 2 да 8 базавых велічынь.

Паважаныя бацькі!

Дарослыя для дзіцяці заўсёды з’яўляюцца аўтарытэтам і прыкладам у выкананні правілаў. Таму вашы дзеці паводзяць сябе на дарозе сапраўды так жа, як і вы.

Знаходзячыся на вуліцы, не спяшайцеся, пераходзьце праезджую частку мерным крокам. Пры гэтым старайцеся не размаўляць – дзіця павінна прывыкнуць, што пры пераходзе дарогі трэба засяродзіцца.

Праезджую частку з дзецьмі пераходзьце толькі на пешаходных пераходах, пры гэтым трымайце дзіця за руку і пераканайцеся, што транспарт саступае вам дарогу.

Пры руху ў цёмны час сутак трэба абазначыць сябе і дзіцяці святлоадбіўнымі элементамі або выкарыстоўваць вопратку са святлоадбівальнымі ўстаўкамі.

Падчас прагулак з дзецьмі звяртайце іх увагу на працу святлафораў, тлумачце значэнне дарожных знакаў, разметкі, вучыце іх назіраць за дарогай і прадбачыць небяспеку.

І памятайце: ад таго, як вы навучыце свайго дзіцяці паводзіць сябе на дарозе, залежаць ваш спакой і яго бяспека.