У Магілёўскай вобласці ад нашэсця жука-караеда ў 2018 годзе пацярпелі сасновыя лясы на плошчы 10 611 га. Пра гэта паведамілі ў Магілёўскім дзяржаўным вытворчым лесагаспадарчым аб’яднанні.

Найбольш значныя плошчы насаджэнняў пашкоджаны ў Бялыніцкім – 1011 га, Бабруйскім – 1633 га, Глускім – 1510 га, Магілёўскім – 705 га, Клічаўскім – 540 га, Асіповіцкім – 2236 га вопытных лясгасах.

У мінулыя гады ў Беларусі праз заражэнне жуком-караедам адзначана масавае ўсыханне хвоі. У бягучым годзе гэты працэс набыў больш значны і масавы характар, адзначылі суразмоўцы. Акрамя Магілёўскай, ужо пацярпелі лясы ў Брэсцкай, Гомельскай, Мінскай абласцях. Праблема ўсыхання хваёвых насаджэнняў адзначана ва Украіне, Польшчы, Фінляндыі, Германіі і іншых еўрапейскіх краінах. Гэта з’ява названа нават біялагічным пажарам.

Прычынамі масавай успышкі развіцця папуляцыі караеда з’явіліся экстрэмальныя пагодныя ўмовы. Спякота, засуха, недахоп вільгаці, ураганы – усё гэта аслабляе дрэвы, і яны ўжо не могуць змагацца са шкоднікамі самастойна. Толькі своечасовае выяўленне заселеных насаджэнняў і аператыўная іх высечка можа выратаваць лес ад размнажэння і далейшага распаўсюджвання жука-караеда.