У Магілёўскай вобласці з 13 лютага для датэрміновага галасавання адкрыецца 715 выбарчых участкаў, паведамілі ў абласной выбарчай камісіі па выбарах дэпутатаў у мясцовыя саветы 28-га склікання.

Прагаласаваць датэрмінова можна будзе па 17 лютага ўключна з 10.00 да 14.00 і з 16.00 да 19.00. Такое права прадастаўлена выбаршчыкам, якія ў дзень выбараў не будуць знаходзіцца па месцы свайго жыхарства. Пры гэтым афіцыйнага пацвярджэння прычын немагчымасці прыйсці на ўчастак для галасавання ў дзень выбараў не патрабуецца.

Для таго каб атрымаць бюлетэнь, выбаршчыку неабходна прад’явіць пашпарт або вадзіцельскае пасведчанне. Вайскоўцы тэрміновай службы могуць прагаласаваць па ваенным білеце, дзяржслужачыя – па службовым пасведчанні, студэнты – па студэнцкім білеце. Бюлетэнь выдадуць пры прад’яўленні пенсійнага пасведчання або пасведчання інваліда (пры наяўнасці ў іх фатаграфіі), даведкі органаў унутраных спраў (для тых, хто згубіў пашпарт) і віду на жыхарства (для грамадзян Расійскай Федэрацыі, якія пастаянна пражываюць у Беларусі).

Усяго ў рэгіёне ўтворана 750 участкаў для галасавання. Створаныя ў санаторыях, прафілакторыях, дамах адпачынку, бальніцах і іншых арганізацыях аховы здароўя 35 участкаў будуць адкрыты ў асноўны дзень галасавання, 18 лютага. Напярэдадні прайшла праверка гатоўнасці выбарчых камісій і ўчасткаў да выбараў. Да пачатку галасавання ўсё гатова: завезены бюлетэні, вывераны спісы выбаршчыкаў. У цэлым у іх уключана больш за 813 тыс. чалавек.

Мясцовыя выбары ў Беларусі прызначаны на 18 лютага. Усяго ў Магілёўскай вобласці плануецца абраць 55 дэпутатаў абласнога Савета дэпутатаў, 675 дэпутатаў раённых і 80 дэпутатаў гарадскіх саветаў, 1746 дэпутатаў Саветаў пярвічнага ўзроўню (сельскіх).