У Магілёўскай вобласці падчас спецыяльнага аператыўна-прафілактычнага комплекснага мерапрыемства «Арсенал» з незаконнага абароту выключаны 34 адзінкі незарэгістраванай зброі. Пра гэта паведаміў афіцыйны прадстаўнік УУС аблвыканкама Уладзімір Сінкевіч.

Таксама канфіскавана 1 041 адзінка боепрыпасаў рознага калібру, больш за 3 кг выбуховых рэчываў. Выяўлена чатыры факты незаконных дзеянняў у дачыненні да зброі і боепрыпасаў, за якія прадугледжана крымінальная адказнасць па арт.295 КК. Напрыклад, супрацоўнікамі Горацкага РАУС падчас санкцыянаванага агляду жылля аднаго з жыхароў раёна былі выяўлены і канфіскаваны 3 адзінкі незарэгістраванай гладкаствольнай зброі, 30 паляўнічых патронаў, 3 патроны да наразной зброі калібра 7,62 мм, 350 капсуляў да паляўнічых патронаў і дзве банкі з сыпкім рэчывам цёмнага колеру вагой 0,3 кг.

Дзякуючы працы з насельніцтвам па тлумачэнні ў органы ўнутраных спраў вобласці добраахвотна здадзены 64 адзінкі незарэгістраванай зброі, больш за 10 кг выбуховых рэчываў. Таксама грамадзянамі здадзены 74 адзінкі зарэгістраванай зброі, 3467 адзінак розных боепрыпасаў. Так, пенсіянерка, жыхарка Чэрыкава, добраахвотна выдала супрацоўнікам міліцыі незарэгістраваную гладкаствольную стрэльбу, якая належала яе памерламу мужу, а жыхар в. Пагуляй Дрыбінскага раёна добраахвотна выдаў ўчастковаму інспектару міліцыі гладкаствольную паляўнічую стрэльбу, якую ён знайшоў пры разборцы свайго старога хлява.

Падчас правядзення мерапрыемстваў выяўлена 61 парушэнне правілаў абароту зброі, за якія прадугледжана адміністрацыйная адказнасць. За розныя парушэнні канфіскавана 100 адзінак зарэгістраванай зброі.

БЕЛТА