У Магілёўскай вобласці ацяпленне ў жылым сектары пачнуць уключаць з 7 кастрычніка. Такое даручэнне сёння даў на пасяджэнні аблвыканкама яго старшыня Уладзімір Даманеўскі.

«У органы ўлады паступае шмат зваротаў і званкоў ад грамадзян з просьбай уключыць цяпло ў жылфондзе. Таму прынята рашэнне падрыхтаваць адпаведнае распараджэнне і пачаць гэту працу з заўтрашняга дня», – сказаў губернатар. Ён выказаў упэўненасць, што сур’ёзных праблем з гэтым не ўзнікне, тым больш што на 29 верасня ўсе спажыўцы і цеплакрыніцы рэгіёна зарэгістравалі пашпарты гатоўнасці.

«Падключэнне аб’ектаў сацыяльнай сферы да цяпла прайшло ў рэгіёне аператыўна і без сур’ёзных ускладненняў, таму мы спадзяёмся, што і з падключэннем жылфонду будзе гэтак жа», – сказаў кіраўнік вобласці. Разам з тым праведзеныя праверкі гатоўнасці раёнаў да ацяпляльнага сезона выявілі шэраг недахопаў. Перш за ўсё яны тычыліся нізкіх тэмпаў нарыхтоўкі драўлянага паліва, затрымкі работ па ўводзе кацельняў на мясцовых відах паліва і рэалізацыі мерапрыемстваў па зніжэнні страт цеплавой энергіі. Па-ранейшаму актуальныя пытанні і своечасовай аплаты арганізацый за спажытыя энергарэсурсы. Уладзімір Даманеўскі даручыў актывізаваць работу па нарыхтоўцы ў вобласці драўлянага паліва, узмацніць увагу да пытанняў аптымізацыі сістэм цеплазабеспячэння, а таксама зрабіць больш жорсткім кантроль своечасовай аплаты за спажытыя энергарэсурсы.

Ён таксама звярнуў асаблівую ўвагу зацікаўленых службаў на актывізацыю работы па прафілактыцы пажараў, аказанне падтрымкі ў вырашэнні праблемных пытанняў адзінокіх пажылых людзей і шматдзетных сем’яў, якія знаходзяцца ў сацыяльна небяспечным становішчы.

Уладзімір Даманеўскі запатрабаваў ад кадраў ЖКГ больш высокай выканальніцкай дысцыпліны і арганізацыі эфектыўнай працы на месцах. На яго думку, неабходна ў найбліжэйшы час правесці сур’ёзны аналіз кадравага патэнцыялу ЖКГ, вырашыць актуальныя пытанні па падрыхтоўцы, прафесійнай перападрыхтоўцы і павышэнні кваліфікацыі кадраў у гэтай сферы.

БЕЛТА