Закладку стабілізацыйнага фонду харчовых тавараў у Магілёўскай вобласці плануецца завяршыць да 15 лістапада. Пра гэта паведамілі ва ўпраўленні гандлю і паслуг аблвыканкама.

Аграрыі вобласці пачалі актыўную фазуўборкі прадукцыі раслінаводства і на працягу 2-3 тыдняў павінны завяршыць амаль усе палявыя работы, акрамя ўборкі позняй капусты. Паралельна з сельгасработамі вядзецца закладка стабфонду. У пералік арганізацый, якія будуць захоўваць харчовыя тавары ў міжсезонны перыяд, увайшло 19 суб’ектаў гаспадарання, пры гэтым сярод іх нямала фермераў. У іх ліку ААТ «Александрыйскае», КФХ «Дыяна» (Шклоўскі раён), КФК «Гайшун» (Бабруйскі раён), фермерская гаспадарка Зайцава В. М., ААТ «Фірма«Кадзіна»»(Магілёўскі раён) і інш.

Зараз у арганізацыях праводзяцца тэхнічныя агляды і падрыхтоўка памяшканняў, прызначаных для захоўвання запасаў харчовых тавараў. Некаторыя ўжо пачалі закладку бульбы. Стабфонд будзе сфарміраваны на 2% большы за ўзровень мінулага года. Нязначнае павелічэнне адбудзецца па асобных пазіцыях. Так, запасы бульбы павінны скласці 4,6 тыс. т, капусты – 2,3 тыс. т (на ўзроўні мінулага года), морквы – 950 т (плюс 4%), буракоў – 820 т (плюс 1%), цыбулі рэпчатай – 850 т (плюс 5,6%), садавіны (яблыкаў) – 850 т (плюс 18,1%). «Прааналізаваўшы рэалізацыю харчовых тавараў у мінулым сезоне, мы ўбачылі, што на моркву, цыбулю рэпчатую і яблыкі попыт быў вышэйшы. Таму і было прынята рашэнне павялічыць іх запасы», – адзначылі ва ўпраўленні.

БЕЛТА