Кампанія па дэклараванні фізічнымі асобамі даходаў, атрыманых у 2017 годзе, праходзіць на тэрыторыі Магілёўскай вобласці. Пра гэта паведамілі ў прэс-цэнтры інспекцыі МПЗ па рэгіёне.

Даць справаздачу ў падатковую інспекцыю варта грамадзянам, якія прадалі на працягу пяці гадоў два і больш дамы, кватэры, дачы, гаражы, садовыя домікі, машына-месцы або зямельныя ўчасткі, а таксама рэалізавалі на працягу каляндарнага года грузавы аўтамабіль, аўтобус, дзве і больш легкавыя машыны. Задэклараваць трэба таксама даходы, атрыманыя з-за мяжы.

Суразмоўцы нагадалі пра падарункі, атрыманыя ў грашовай і натуральнай форме. Дэкларацыя патрабуецца, калі ў мінулым годзе іх памер перавысіў Br5 555. Выключэнне – падарункі ад блізкіх сваякоў і асоб, якія знаходзяцца паміж сабой у адносінах сваяцтва, апекуна, папячыцеля i падапечнага.

Падатковую дэкларацыю (разлік) па падаходным падатку за 2017 год трэба прадставіць не пазней за 1 сакавіка 2018 года. Падатак выплачваецца не пазней 15 мая 2018 года.

Дакументы падаюцца грамадзянамі ў падатковы орган па месцы рэгістрацыі. Прыём дэкларацый ажыццяўляецца ў рабочыя дні з 8.00 да 19.00, а таксама 17 і 24 лютага з 9.00 да 13.00.

Больш падрабязную інфармацыю можна атрымаць у падатковай інспекцыі па месцы жыхарства, на сайце МПЗ у раздзеле «Прадстаўленне фізічнымі асобамі падатковай дэкларацыі за 2017 год» альбо патэлефанаваць у кантакт-цэнтр МПЗ па нумары 189, +37517 229 79 79.