Магілёўскі абласны штаб студэнцкіх атрадаў плануе сфарміраваць у 2019 годзе каля 300 студэнцкіх атрадаў, паведамілі ў абкаме БРСМ.

У вобласці ўжо вызначана 130 аб’ектаў, на якіх будуць працаваць байцы студэнцкіх атрадаў. Яны будуць задзейнічаны на будаўніцтве дарог, школ і дзіцячых садкоў, аб’ектах сельскагаспадарчых арганізацый, на зернесушыльных комплексах, у лесагадавальніках лесагаспадарчых устаноў, на добраўпарадкаванні гарадскіх аб’ектаў, у санаторыях і дзіцячых аздараўленчых лагерах.

Таксама 5 студэнцкіх сэрвісных атрадаў, сфарміраваных у Магілёўскім дзяржаўным універсітэце харчавання і Магілёўскім тэхналагічным каледжы, будзе працаваць на II Еўрапейскіх гульнях. Студэнты Беларускай сельгасакадэміі дапамогуць аграрыям падчас пасяўной і ўборачнай кампаній, а студэнты Беларуска-Расійскага ўніверсітэта будуць задзейнічаны на будаўніцтве аб’ектаў у Астраўцы.

Беларускі рэспубліканскі саюз моладзі абвясціў 2019-ы Годам студэнцкіх атрадаў. Такое рашэнне было прынята на III Пленуме Цэнтральнага Камітэта саюза моладзі. З 11 сакавіка ў Беларусі стартавала рэспубліканская акцыя «Выбіраем студатрад!» Яе мэта – інфармаванне маладых людзей як патэнцыйных удзельнікаў студатрадаўскага руху аб магчымасцях працаўладкавання ў перыяд трэцяга працоўнага семестра, папулярызацыя студатрадаўскага руху.

БЕЛТА