У Магілёўскай вобласці вызначана больш за 30 пунктаў для правядзення абраду акунання падчас свята Хрышчэння. Пра гэта карэспандэнту сайта паведамілі ў Магілёўскай абласной арганізацыі РДГА АСВОД.

У большасці месцаў будуць устаноўлены палаткі з аўтаномным ацяпленнем, палявыя кухні з раздачай гарбаты, арганізаваны гандаль гарачым харчам.

«Мы гатовыя да прыёму людзей. Для аховы правапарадку дадаткова будуць прыцягнуты супрацоўнікі міліцыі, ДАІ, медыцынскія работнікі, валанцёры Беларускага таварыства Чырвонага Крыжа, узмоцнена дзяжурства штатных ратавальнікаў АСВОДа, якое пачнецца 18 студзеня і працягнецца да позняга вечара 19 студзеня», – сказалі суразмоўцы. Яны таксама заклікалі вернікаў пры наведванні месцаў акунання быць дысцыплінаванымі і пільнымі, каб пазбегнуць надзвычайных здарэнняў.

У Магілёве на Хрышчэнне месцы для купання будуць арганізаваны на Пячэрскім возеры і Грабянёўскім вадасховішчы. У Бабруйску падрыхтаваны дзве палонкі для купання на Бярэзіне: у раёне вяслярнай базы Бабруйскай дзіцяча-юнацкай школы алімпійскага рэзерву (вул. Берагавая, 57) і гарадскога пляжу №2 у мікрараёне №6. У Магілёўскім раёне акунуцца можна будзе ў купель ў вёсках Палыкавічы, Сухары, Дубінка.

Рэкамендацыі Міністэрства па надзвычайных сітуацыях па купанні ў палонцы:

• акунацца (купацца) варта ў спецыяльна абсталяваных палонках ля берага, пажадана паблізу выратавальных станцый, пад наглядам ратавальнікаў;

• перад купаннем ў палонцы неабходна разагрэць цела, зрабіўшы размінку, прабежку;

• да палонкі неабходна падыходзіць у зручным, не слізкім абутку, які лёгка здымаецца, каб прадухіліць страту адчувальнасці ног. Найлепш выкарыстоўваць чаравікі ці ваўняныя шкарпэткі для таго, каб дайсці да палонкі. Магчыма выкарыстанне спецыяльных гумавых тапак, якія таксама абараняюць ногі ад вострых камянёў, а таксама не дадуць вам слізгаць на лёдзе. Ідучы да палонкі, памятайце, што дарожка можа быць слізкай. Ідзіце павольна і ўважліва;

• акунацца лепш за ўсё па шыю, не замачыўшы галаву, каб пазбегнуць рэфлекторнага звужэння сасудаў галаўнога мозга. Ніколі не кідайцеся ў палонку наперад галавой. Скачкі ў ваду і апусканне ў ваду з галавой не рэкамендуюцца, паколькі гэта рэзка паніжае тэмпературу і можа прывесці да шоку ад холаду;

• пры ўваходзе ў ваду першы раз старайцеся хутка дасягнуць патрэбнай вам глыбіні, але не плавайце. Памятайце, што халодная вада можа выклікаць зусім нармальнае бяспечнае частае дыханне;

• не знаходзьцеся ў палонцы больш за 1 мінуту, каб пазбегнуць агульнага пераахалоджвання арганізма;

• пасля купання разатрыце сябе махровым ручніком і надзеньце сухую вопратку;

• для ўмацавання імунітэту і магчымасці пераахалоджвання неабходна выпіць гарачага чаю, лепш за ўсё з ягад, садавіны і агародніны з папярэдне падрыхтаванага тэрмаса.

У месцах купання (абмывання) забараняецца:

• купацца ў стане алкагольнага ап’янення;

•ныраць і плаваць пад вадой;

• падаваць сігналы лжывай трывогі;

• забруджваць і засмечваць водныя аб’екты і берагі;

• прыводзіць з сабой сабак і іншых жывёл;

• збірацца групамі на лёдзе каля краю палонкі;

• заходзіць за агароджы.

Купанне дзяцей дапускаецца толькі з бацькамі ці дарослымі сваякамі.