Круглы стол для бізнес-супольнасці па пытаннях уступлення Беларусі ў Сусветную гандлёвую арганізацыю (СГА) адбудзецца 17 кастрычніка ў канферэнц-зале гасцініцы «Магілёў» абласнога цэнтра. Мерапрыемства рэалізуецца ў рамках «Тыдня СГА ў Рэспубліцы Беларусь», паведамілі арганізатары.

Чакаецца, што ў Круглым стале прымуць удзел прадстаўнікі Міністэрства замежных спраў Беларусі, Праграмы развіцця ААН (ПРААН) у Беларусі, Магілёўскага абласнога выканаўчага камітэта, кіраўнікі мясцовых органаў улады, прадпрыемстваў вобласці, бізнес-аб’яднанняў, вышэйшых навучальных устаноў.

Падчас мерапрыемства ўдзельнікі разам з міжнароднымі і нацыянальнымі экспертамі, спецыялістамі ў галіне знешняга гандлю і СГА абмяркуюць найбольш запатрабаваныя тэмы аб працэсе, статусе і наступствах уступлення ў СГА, а таксама аб правілах працы на прасторы СГА. У рамках круглага стала таксама будзе прадстаўлены распрацаваны ў 2018 годзе дапаможнік «СГА ў інтарэсах прадпрыемстваў».

«У цяперашні час далучэнне да СГА з’яўляецца адной з прыярытэтных задач знешнегандлёвай палітыкі Беларусі, – адзначылі суразмоўцы. – Членства ў СГА дазволіць краіне забяспечыць стабільныя і прадказальныя ўмовы гандлю з краінамі міжнароднай супольнасці, а замежным інвестарам і вытворцам – агульнапрынятыя правілы ажыццяўлення знешнеэканамічнай дзейнасці ў Беларусі. У апошнія гады краіна прадэманстравала значны прагрэс на шляху далучэння да СГА і ўступіла ў завяршальную стадыю перагаворнага працэсу: фарміраванне выніковых абавязацельстваў перад СГА».

Чакаецца, што па выніку Круглага стала ўдзельнікі павысяць сваю дасведчанасць адносна працэсу і наступстваў уступлення краіны ў СГА, вывучаць практычныя пытанні, звязаныя з працай прадпрыемстваў у СГА.

Круглы стол арганізаваны і праводзіцца ў межах праекта «Садзейнічанне ўраду Рэспублікі Беларусь пры ўступленні ў Сусветную гандлёвую арганізацыю праз узмацненне экспертнага і інстытуцыйнага патэнцыялу (5-я фаза)», што фінансуецца ўрадам Расійскай Федэрацыі і рэалізуецца Праграмай развіцця ААН у партнёрстве з Міністэрствам замежных спраў Рэспублікі Беларусь.