У Магілёве з 20 жніўня па 19 верасня праходзіць месячнік па навядзенні парадку, паведамілі ў аддзеле жыллёва-камунальнай гаспадаркі гарвыканкама.

Асаблівую ўвагу нададуць месцам адпачынку і добраўпарадкаванню двароў, плошчаў, сквераў і паркаў. «Да гэтых работ мы плануем максімальна прыцягнуць мясцовых жыхароў, якія могуць і жадаюць дапамагчы рэсурсамі, матэрыяламі і сваёй працай у добраўпарадкаванні. Гэта можа быць і дапамога ў прывядзенні ў парадак аб’ектаў, якія знаходзяцца побач. Напрыклад, у абнаўленні дзіцячай або спартыўнай пляцоўкі», – адзначылі ў аддзеле жыллёва-камунальнай гаспадаркі.

У раёнах горада створаны рабочыя групы, якія павінны аператыўна вызначыць аб’ёмы неабходных работ. «Асноўныя аб’екты і аб’ёмы работ мы, вядома, возьмем на сябе, але чым больш актыўна далучацца да гэтага працэсу самі магілёўцы, тым больш будзе зроблена і тым больш камфортным для пражывання стане горад», – падкрэслілі ў гарвыканкаме.

Таксама актыўна будзе весціся ліквідацыя звалак. Правераць тэрыторыі прадпрыемстваў і будпляцоўкі Магілёва. Падчас месячніка адбудзецца агульнагарадскі суботнік. Яго дакладная дата і фармат правядзення абмяркоўваюцца.

БЕЛТА