Вынікі літаратурнага конкурсу, прысвечанага памяці Канстанціна Сіманава і Году малой радзімы, падвядуць у Магілёве 30 лістапада.

Конкурс быў абвешчаны гэтым летам і праводзіўся да 1 лістапада па трох намінацыях: «Малая проза», «Паэзія»і «Пераклад». Удзельнікам ва ўзросце ад 15 да 18 гадоў было прапанавана напісаць сачыненне ў эпісталярным жанры на тэму «Добры дзень, мой аднагодак з мірнага XXI стагоддзя...» Тым, хто старэйшы – прысвяціць свае літаратурныя працы на выбар – творчасці Сіманава, гераічнай абароне Магілёва, перамозе, Году малой радзімы або антываеннай тэматыцы.

Пераможцаў літаратурнага конкурсу вызначаць у кожнай намінацыі і кожнай узроставай катэгорыі. Урачыстая цырымонія ўзнагароджання адбудзецца на «Сіманаўскіх чытаннях 2018», якія пройдуць у Магілёве 30 лістапада і 1 снежня. Лаўрэаты будуць узнагароджаны дыпломамі і падарункамі.

Сіманаўскія чытанні праводзяцца ўжо не першы год, бо аўтар «Жывых і мёртвых» праславіў подзвіг абаронцаў Магілёва ў ліпені 1941 года. Ён быў на перадавой, меў зносіны з палкоўнікам Куцепавым, пасля правобразам генерала Сярпіліна. На Буйніцкім полі, паводле завяшчання Сіманава, развеяны яго прах, устаноўлены валун у яго гонар. У памяць пра пісьменніка-франтавіка яго імем названа адна з вуліц Магілёва.

СБ