Другі турнір вулічных баёў «Стрэлка» прайшоў на цэнтральным магілёўскім стадыёне “Спартак”. Магілёў – адзіны беларускі горад, які прыняў эстафету гэтага папулярнага ў Расіі байцоўскага шоу. За яго арганізацыю сур’ёзна ўзяліся спартыўны клуб «Пераможца» і аб’яднанне прафесійнага бокса. І трэба прызнаць, што папулярнасць турніру імкліва расце.

На гэты раз на рынг выходзілі 11 байцоў з Магілёва, Гомеля, Оршы. Гледачы ўбачылі шэсць відовішчных баёў, адзін з якіх быў спараным. Два баі правёў адзін з самых актыўных байцоў «Стрэлкі» – былы пагранічнік, 41-гадовы магіляўчанін Андрэй Тупоўскі. Ужо на другі турнір ён прыходзіць разам з сям’ёй – жонка і сын яго самыя актыўныя заўзятары.

Больш за ўсё гледачы чакалі галоўную сутычку – паядынак байцоў у суперцяжкай вазе. Пераможца першай магілёўскай стрэлкі Арцём Мозалеў пасля першага турніру стаў зоркай Юцюба – відэа яго баёў набрала больш за 650 тыс. праглядаў. У гэты раз Арцём, па байцоўскім псеўданіме Манах, накаўтам перамог старэйшага на сем гадоў і на 10 кг большага ў вазе суперніка. Вынік быў нечаканым для гледачоў. Але, напрыклад, афіцыйны прадстаўнік беларускага грамадскага аб’яднання прафесійнага бокса Яўген Дзехцярук быў упэўнены ў яго зыходзе:

– Я бачыў настрой Арцёма, яго баявы дух. Ён быў гатовы сустрэцца з больш моцным супернікам. З такімі дадзенымі гэты баец мае рэальныя перспектывы стаць чэмпіёнам свету па вулічных баях. Сакрэт папулярнасці «Стрэлкі» не толькі ў тым, што выйсці на рынг і выпрабаваць сябе можа кожны. Гэта яшчэ і выдатная магчымасць раскруціць добрых байцоў, зрабіць іх знакамітымі.

Рэферы турніру майстар спорту па дзюдо і самба Сяргей Васілевіч лічыць, што кожны баец «Стрэлкі» – гэта ўжо пераможца. «Тут у першую чаргу праходзіць выпрабаванне мужнасці смельчакоў, якія выходзяць на рынг. Бо пераадолець сябе, выйсці з зоны камфорту далёка няпроста. Кожны з іх годны павагі – і тыя, хто перамог у баі, і тыя, хто прайграў», – адзначыў ён.

СБ