У Магілёве сёння стартавалі сустрэчы тэматычных груп па дэталёвым аналізе напрамкаў, якія маюць высокую значнасць для ўстойлівага развіцця вобласці. Першым блокам, над якім працавалі эксперты, сталі эканоміка, малы і сярэдні бізнес.

На працягу дня ўдзельнікі палілогу праводзілі SWOT-аналіз, вызначаючы моцныя і слабыя бакі рэгіёна ў сферы названага тэматычнага кірунку, знешнія магчымасці і рызыкі, важныя для яго развіцця, і інш.

Заўтра ў канферэнц-зале Магілёўскага абласнога ўпраўлення ФСАН адбудзецца абмеркаванне па тэме «Экалогія і кліматычная нейтральнасць». 24 красавіка збяруцца спецыялісты сацыяльнай сферы, а на 25-е запланавана дыскусія «Адукацыя ў інтарэсах устойлівага развіцця».

Нагадаем, стратэгію ўстойлівага развіцця (СУР) Магілёўскай вобласці да 2035 года плануецца распрацаваць да канца бягучага года.