Мерапрыемствы, прысвечаныя 310-годдзю перамогі рускіх войскаў над шведамі ў бітве пры Лясной, пройдуць 30 верасня ў Слаўгарадскім раёне. Пра гэта карэспандэнту сайта паведамілі ў райвыканкаме.

Адкрые свята богаслужэнне ў Святапетрапаўлаўскім храме-помніку. «Указам Пятра I у Лясной штогод праводзілася памінальная імша па загінулых тут рускіх воінах. Цяпер гэтая традыцыя працягваецца, і на працягу многіх гадоў у дзень бітвы здзяйсняецца літургія», – расказалі суразмоўцы.

Пасля заканчэння набажэнства адбудзецца хрэсны ход з ускладаннем кветак і вянкоў да памятнага знака, устаноўленага ў гонар перамогі рускіх войскаў у бітве пры Лясной у 1708 годзе падчас Паўночнай вайны.

Працягнецца фестываль пасадкай дрэў у паркавай зоне і прэзентацыяй выставы «Духоўная спадчына роднай зямлі» каля храма-помніка.

У 13.00 на Цэнтральнай плошчы пачнецца тэматычная праграма з элементамі анімацыі. Чакаецца, што ў канцэрце прымуць удзел не толькі калектывы мастацкай самадзейнасці Слаўгарадскага раёна, але і госці з Расіі.

У Ляснянскім сельскім доме культуры адбудзецца Круглы стол па тэме «Бітва пры Лясной» з удзелам прадстаўнікоў ГА «Рускае культурна-асветніцкае таварыства».

На працягу дня ў аграгарадку будзе працаваць панарамная экспазіцыя «Эпоха Пятра Вялікага», выстава-продаж сувеніраў ад майстроў і ўмельцаў Магілёўшчыны, а таксама знакамітых сыроў, вырабленых мясцовымі сыраварамі. Акрамя таго, жадаючыя змогуць праехаць з агляднымі аўтобуснымі экскурсіямі па турыстычных аб’ектах раёна.

Аграгарадок Лясная Слаўгарадскага раёна – месца вайсковай славы. Тут 310 гадоў таму адбылася падзея, якая знаходзіцца ў шэрагу 100 вялікіх бітваў свету. 28-29 верасня (па старым стылі) 1708 года ля вёскі Лясная адбылася найважнейшая бітва Паўночнай вайны паміж рускімі войскамі пад камандаваннем Пятра I і шведскім корпусам генерала Левенгаўпта, у якой шведскі корпус пацярпеў паражэнне. Пётр I перамогу пад Лясной назваў «першай салдацкай пробай» і маці Палтаўскай баталіі. У гонар 200-годдзя перамогі рускіх войскаў у гэтай бітве ў вёсцы Лясная быў устаноўлены помнік і ўзведзены Святапетрапаўлаўскі храм.

Праграма правядзення мерапрыемстваў, прысвечаных 310-годдзю бітвы пры Лясной Слаўгарадскага раёна

8.45 – перазвон (Святапетрапаўлаўскі храм-помнік агр. Лясная);

9.00 – 10.45 – архірэйскае служэнне Боскай Літургіі ў Святапетрапаўлаўскім храме-помніку (Святапетрапаўлаўскі храм-помнік агр. Лясная);

10.45 – 11.15 – хрэсны ход ад храма-помніка да памятнага знака, устаноўленага ў гонар перамогі рускіх ваяроў у бітве пры Лясной у 1708 годзе падчас Паўночнай вайны (агр. Лясная);

11.15 – 11.30 – пасадка дрэў у паркавай зоне (агр. Лясная);

11.30 – 12.00 – прэзентацыя выставы «Духоўная спадчына роднай зямлі» (Выставачны павільён ля Святапетрапаўлаўскага храма-помніка агр. Лясная);

13.00 – 15.00 – урачыстае мерапрыемства, прысвечанае 310-годдзю бітвы пры Лясной (Цэнтральная плошча, агр. Лясная);

14.00 – 15.30 – Круглы стол па тэме «Бітва пры Лясной» (Ляснянскі сельскі дом культуры);

9.00 – 17.00 – праца панарамнай экспазіцыі «Эпоха Пятра Вялікага» (Цэнтральная плошча, агр. Лясная);

9.00 – 17.00 – выстава-продаж тэматычнай прадукцыі, вырабленай народнымі майстрамі і ўмельцамі з рэгіёнаў Магілёўскай вобласці (Цэнтральная плошча, агр. Лясная);

9.00 – 17.00 – аглядныя аўтобусныя экскурсіі па турыстычных аб’ектах раёна (Цэнтральная плошча, агр. Лясная);

9.00 – 17.00 – выстава продаж прадукцыі мясцовых сыравары (Сырная крама, агр. Лясная).