Ушанаванне найлепшых работнікаў сельскай гаспадаркі рэгіёна, пераможцаў уборачнай кампаніі 2018 года адбудзецца 17 лістапада ў Палацы культуры вобласці. Пра гэта карэспандэнту сайта паведамілі ў камітэце па сельскай гаспадарцы і харчаванні Магілёўскага аблвыканкама.

Заслужаныя ўзнагароды атрымае каля 90 спецыялістаў. Падарункам для прысутных стануць выступленні творчых калектываў. Будуць арганізаваны выставы-прэзентацыі прадпрыемстваў перапрацоўкі Прыдняпроўскага краю і выязны гандаль.

Урачыстае мерапрыемства прымяркуюць да Дня работнікаў сельскай гаспадаркі і перапрацоўчай прамысловасці, які ў гэтым годзе адзначаецца ў Беларусі 18 лістапада.