Узаемаадносіны Беларусі і Расіі павінны выйсці на якасна новы ўзровень. Пра гэта заявіла сёння на сустрэчы з губернатарамі рэгіёнаў Беларусі і Расіі Старшыня Савета Федэрацыі Федэральнага сходу Валянціна Мацвіенка.

Паводле слоў Валянціны Мацвіенка, у абедзвюх краін назапашаны дастаткова эфектыўны вопыт супрацоўніцтва паміж рэгіёнамі, падпісаны пагадненні, дагаворы паміж суб’ектамі гаспадарання. Шмат дакументаў будзе падпісана і сёння. «Важна, каб яны былі напоўнены канкрэтным зместам, каб былі рэальныя механізмы іх рэалізацыі, – сказала старшыня. – Гэтым вы будзеце ўносіць рэальны ўклад у развіццё Саюзнай дзяржавы».

Валянціна Мацвіенка папрасіла расійскіх губернатараў узяць пад асабісты кантроль беларуска-расійскія адносіны. Кожны працоўны дзень кіраўніка павінен пачынацца менавіта з гэтага. Да гэтага абавязвае і ўвага да Форума рэгіёнаў. «Нам трэба дамагчыся, каб беларуска-расійскія стасункі ніколі і ні ў чым не прабуксоўвалі», – падкрэсліла яна.

«Цяпер мы павінны зрабіць акцэнт не на колькасным падліку дагавораў і пагадненняў, а з наступнага форума ацэньваць іх змястоўны фактар супрацоўніцтва, а таксама ўвесці фармат справаздач, як мы пражылі пэўны адрэзак часу, каб многія суб’екты маглі даведацца станоўчы вопыт двухбаковага ўзаемадзеяння», – лічыць Валянціна Мацвіенка.

Старшыня Савета Рэспублікі Міхаіл Мясніковіч дадаў, што цяперашні Форум рэгіёнаў з’яўляецца самым прадстаўнічым. У ім удзельнічаюць госці з 31 рэгіёна Расійскай Федэрацыі. Усяго ён сабраў у Магілёве больш за 2 тыс. удзельнікаў. «Для нас гэта вельмі адказна, таму мы павінны прыкласці ўсе намаганні, каб нашы чаканні ад форума апраўдаліся, а праца на ім была плённай і эфектыўнай», – сказаў Міхаіл Мясніковіч. Па выніках сустрэчы паміж шэрагам рэгіёнаў Беларусі і Расіі падпісаны пагадненні аб гандлёва-эканамічным, навукова-тэхнічным і культурным супрацоўніцтве.

БЕЛТА