ВНУ Беларусі заканчваюць прыём дакументаў на бюджэтныя месцы ў абітурыентаў.

У апошні дзень прыёмныя камісіі будуць працаваць у штатным рэжыме да 18.00.

18 ліпеня пачынаюцца ўступныя выпрабаванні, якія праводзяцца непасрэдна ва ўстановах адукацыі (па творчасці, фізічнай культуры, а таксама для абітурыентаў, якія паступаюць для атрымання вышэйшай адукацыі ў скарочаны тэрмін на аснове сярэдняй спецыяльнай адукацыі). Усе ўступныя выпрабаванні арганізаваны толькі ў адну сесію, як для тых, хто паступае за кошт сродкаў бюджэту, так і на платнай аснове. Таму абітурыенты, якія здаюць унутраныя ўступныя іспыты ў ВНУ, незалежна ад таго, паступаюць яны на бюджэт ці на платнае аддзяленне, таксама падаюць дакументы да 17 ліпеня ўключна.

Залічэнне на бюджэт працягнецца па 28 ліпеня, у сілавых ВНУ – па 24, у творчых – па 28 ліпеня.

Прыём дакументаў на вакантныя бюджэтныя месцы дадатковага набору ў дзённай і завочнай формах у большасці ВНУ пройдзе з 30 ліпеня па 1 жніўня. Інфармацыя пра наяўнасць вакантных месцаў дадатковага набору будзе размешчана на сайтах ВНУ да 29 ліпеня.

Прыём дакументаў на навучанне на ўмовах аплаты ў вочнай (дзённай, вячэрняй) або завочнай, у тым ліку дыстанцыйнай, формах для абітурыентаў, якія не здаюць унутраныя ўступныя выпрабаванні, праводзіцца з 12 ліпеня па 4 жніўня (у сілавыя ВНУ – 12-31 ліпеня, у творчыя – з 12 ліпеня па 2 жніўня). Завяршыцца прыёмная кампанія ў ВНУ 6 жніўня – апошні дзень залічэння на платнай аснове.

Падрабязная інфармацыя аб уступнай кампаніі ва ўстановах вышэйшай, сярэдняй спецыяльнай і прафесійнай адукацыі Беларусі прадстаўлена на партале Міністэрства адукацыі, а таксама на сайтах устаноў адукацыі.

БЕЛТА