Вучоныя Беларускай дзяржаўнай сельгасакадэміі дапамогуць аграрыям. Аб’яднаўшы намаганні з мясцовымі ўладамі, супрацоўнікі ВНУ распрацавалі Праграму ўстойлівага развіцця АПК Дрыбінскага раёна на аснове навуковых даследаванняў, перадавых тэхналогій і інавацый. Яна прадугледжвае значнае павелічэнне вытворчасці ўсіх відаў прадукцыі.

Прарэктар па навуковай рабоце акадэміі Юрый Тыбец растлумачыў: праца па вывядзенні АПК раёна на ўстойлівае развіццё ідзе па двух напрамках. Першы– апора на існуючую базу. Напрыклад, супрацоўнікі акадэміі рэкамендавалі гаспадаркам заняцца вырошчваннем насення шматгадовых траў і зернебабовых. Вельмі выгадны бізнес. Рэнтабельнасць – 200-500 працэнтаў. Ажыццявіць прапанову ў ААТ «Міхееўка-Агра» ўзяліся кандыдаты сельскагаспадарчых навук, дацэнты кафедры кормавытворчасці і захавання прадукцыі раслінаводства Уладзімір Пятрэнка і Сяргей Станкевіч. Вывучылі ўсе землі гаспадаркі, падабралі найбольш перспектыўныя для насенняводства.

Другі напрамак – рэалізацыя новых інвестыцыйных праектаў. Мясцовым гаспадаркам яны не пад сілу: няма свабодных сродкаў, крэдыты не выдзяляюцца. Разлічваюць на прыход прыватнага бізнесу. Інвестары могуць заняцца вырошчваннем грыбоў, пабудаваць гусяферму з цэхам перапрацоўкі, комплекс па вытворчасці мяса труса. Прапануецца таксама арганізаваць вытворчасць па перапрацоўцы адходаў нафтапрадуктаў, прадпрыемства па вытворчасці пелет, заводы па выпуску тратуарнай пліткі і цэглы.

СБ