Вялікі гарадскі пікнік правядуць у Магілёве 26 мая. Пра гэта паведамілі ў Цэнтры гарадскіх ініцыятыў.

Месцам правядзення мерапрыемства стане набярэжная Дняпра ў раёне гарадскога пляжа. Тут з 13.00 да 21.00 адпачывальнікам прапануюць не проста весела, культурна правесці час на прыродзе з сям’ёй і сябрамі, але і адрадзіць традыцыю правядзення пікнікоў на свежым паветры. Прычым ежу можна будзе прынесці з сабой або набыць на аб’ектах гандлю.

«Гэта ўжо чацвёрты пікнік. Тры мінулыя прайшлі вельмі добра і пазітыўна. Гараджане даказалі самі сабе, што могуць арганізоўваць цікавыя мерапрыемствы. У гэтым годзе не станем змяншаць абароты і пастараемся зрабіць свята яшчэ ярчэйшым, – адзначылі суразмоўцы. – Па-ранейшаму будзе існаваць абмежаванне – забарона на ўжыванне алкагольных напояў і курэнне на тэрыторыі пікніка».

Праграма мерапрыемства складаецца спантанна, грунтуючыся на ініцыятывах магілёўцаў. Агульная схема свята ўжо вызначана, але ў жадаючых далучыцца да каманды арганізатараў і партнёраў са сваімі ідэямі і ініцыятывамі яшчэ ёсць магчымасць гэта зрабіць.

Тэрыторыя пікніка будзе ўмоўна падзелена на некалькі тэматычных зон: гульнявая, адукацыйная, музычная, мастацкая, дзіцячая, фудкорт. У межах свята гасцям і жыхарам нашага горада будзе прапанавана мноства забавак. Так, жадаючых запросяць прыняць удзел у майстар-класе «Карціна за гадзіну» (пройдуць у 13.00, 15.00 і 17.00), пастраляць з лука, паўдзельнічаць у спаборніцтвах на робатах-самалёціках, наведаць адкрытыя ўрокі праграмавання, інтэлектуальна-забаўляльную віктарыну, лазерны лабірынт з элементамі квэста, паглядзець 3D-фокусы. Чараўнікі са святочнага агенцтва правядуць крыяшоу, нанясуць фантастычны аквагрым і навучаць усіх варыць духмянае мыла. Не абыдзецца без камандных гульняў, флэшмобаў і выступленняў музычных калектываў. Сярод яркіх забаў гарадскога пікніка – «Арнамент style» – вышыўка па будаўнічай сетцы. Новы ўзровень стрыт-арта прадэманструюць майстры «Шчырай Майстэрні» і выпускнікі школы гарадскіх ініцыятыў «Цяпліца».

«Мы хочам, каб магілёўцы ў самым пачатку цёплага сезона ўбачылі, як можна цікава, крэатыўна і разнастайна праводзіць свой час. І не трэба чакаць, што хтосьці возьме і арганізуе забавы ў горадзе. Гэта трэба браць у свае рукі і рабіць самім», – падкрэслілі суразмоўцы.