У Магілёўскай вобласці для галасавання адкрылася 750 выбарчых участкаў. Пры гэтым у санаторыях, прафілакторыях, дамах адпачынку, бальніцах і іншых арганізацыях аховы здароўя, якія аказваюць меддапамогу ў стацыянарных умовах, створана 35 участкаў, паведамілі ў абласной выбарчай камісіі па выбарах дэпутатаў у мясцовыя Саветы 28-га склікання.

Зрабіць свой выбар на карысць таго ці іншага кандыдата ў дэпутаты можна будзе да 20.00. Для таго каб атрымаць бюлетэнь, выбаршчыку неабходна прад’явіць пашпарт альбо вадзіцельскае пасведчанне. Вайскоўцы тэрміновай службы могуць прагаласаваць па ваенным білеце, дзяржслужачыя – па службовым пасведчанні, студэнты – па студэнцкім білеце. Бюлетэнь выдадуць пры прад’яўленні пенсійнага пасведчання або пасведчання інваліда (пры наяўнасці ў іх фатаграфіі), даведкі органаў унутраных спраў (для тых, хто згубіў пашпарт) і віду на жыхарства (для грамадзян Расійскай Федэрацыі, якія пастаянна пражываюць у Беларусі).

Усяго ў рэгіёне сфарміравана 176 тэрытарыяльных выбарчых камісій па выбарах дэпутатаў у мясцовыя Саветы, у тым ліку Магілёўская абласная камісія, 21 раённая, 2 гарадскія ў гарадах абласнога падпарадкавання, 152 сельскіх, 55 акруговых па выбарах у абласны Савет дэпутатаў.

У цэлым у Магілёўскай вобласці плануецца абраць 55 дэпутатаў абласнога Савета дэпутатаў, 675 дэпутатаў раённых і 80 дэпутатаў гарадскіх саветаў, 1746 дэпутатаў Саветаў першаснага ўзроўню (сельскіх). Па выніках рэгістрацыі на адно дэпутацкае месца прэтэндуюць 2 кандыдаты. Крыху больш за адну чацвёртую зарэгістраваных прэтэндэнтаў – дэпутаты дзеючага склікання.