Камітэт дзяржкантролю Магілёўскай вобласці правёў праверку Палыкавіцкага сельвыканкама па пытаннях эфектыўнасці выкарыстання зямельных рэсурсаў і выканання патрабаванняў зямельнага заканадаўства. Пра гэта паведаміў намеснік старшыні КДК Аляксей Іглікаў.

Устаноўлена 13 выпадкаў невыканання ўмоў прадастаўлення зямель, у 4 з іх грамадзяне нават не прыступілі да заняцця ўчасткаў, у 9 – парушылі тэрміны будаўніцтва жылых дамоў. Пры гэтым прадугледжаныя ў названых выпадках меры ўздзеяння па «даўгабудах» сельвыканкам не прымаў.

Два грамадзяніны прымудрыліся пабудаваць з дзяржпадтрымкай жыллё ў Магілёве і атрымаць для гэтых жа мэтаў зямельныя ўчасткі ў яго прыгарадзе без аўкцыёну.

Акрамя таго выкрыты парушэнні заканадаўства аб зваротах грамадзян, бюджэтнага заканадаўства, нормаў і правілаў па доглядзе тэрыторый населеных пунктаў.

Матэрыялы праверкі рыхтуюцца да перадачы ў праваахоўныя органы, вінаватыя прыцягнуты да адміністрацыйнай адказнасці.