Выстава графічных работ «Птушкі Беларусі» праходзіць у Палацы мастацтваў Бабруйска. Серыя самадзейнай мастачкі Юліі Кравец з 26 работ прымеркавана да Года малой радзімы і дэманструе багацце прыроды нашай краіны, паведамілі ў аддзеле мастацкай творчасці ўстановы культуры.

 «Гэта ўжо не першая выстава аўтара, арганізаваная нашым аддзелам, – адзначылі суразмоўцы. – У мінулым годзе ўпершыню на суд гледачам мастачка прадставіла экспазіцыю работ пад назвай «Натхненне», якая з поспехам прайшла пасля ў краязнаўчых музеях у вёсцы Сычкава і Глуску».

Выстава «Птушкі Беларусі» працягнецца да канца верасня.

Юлія Кравец – таленавіты мастак. Адсутнасць класічнай мастацкай адукацыі не перашкаджае ёй свабодна выказваць думкі на лісце паперы з дапамогай простага алоўка. Яна будуе кампазіцыі ў форме калажаў, у якіх прысутнічае глыбіня зместу і вострае перажыванне праблем сучаснага грамадства.