Персанальная выстава Алы Веліканавай «Карціны чароўнай цішыні» адкрыецца 15 мая ў арт-фае Магілёўскага абласнога драматычнага тэатра. Прэзентацыя работ адбудзецца з удзелам аўтара, паведамілі карэспандэнту сайта ў адміністрацыі ўстановы культуры.

Экспазіцыя прымеркавана да 130-гадовага юбілею тэатра. На выставе будзе прадстаўлена каля 20 аўтарскіх карцін, выкананых у тэхніцы ручной вышыўкі крыжом па фатаграфіі. Сярод твораў – партрэты знакамітасцяў, акцёраў нашага драмтэатра.

Урачыстае адкрыццё выставы адбудзецца на першым паверсе ў 17.30. Экспазіцыя будзе працаваць да канца чэрвеня. Наведаць яе зможа кожны, хто набудзе білет на спектакль.

Ала Веліканава займаецца вышыўкай крыжыкам больш за 20 гадоў. За гэты час карціны змянялі складанасць, манеру і тэматыку. Чатыры гады таму майстрыха занялася распрацоўкай схем і вышыўкай па фатаграфіях. Першымі працамі сталі асобы рэальных людзей і сяброў – акцёраў з мясцовага тэатра драмы. Астатнія творы – родныя людзі, а таксама тыя, хто сваім лёсам і творчасцю паўплываў на яе свядомасць, душу. Пра гэта гаворыць і выбар асоб, і індывідуальны падбор фону да кожнай з іх.