XI Міжнародны інвестыцыйны форум «Млын поспеху» адбудзецца ў абласным цэнтры 28-29 чэрвеня. Пра гэта карэспандэнту сайта паведамілі ў Магілёўскім агенцтве рэгіянальнага развіцця.

«Форум з’яўляецца ключавым мерапрыемствам года для прэзентацыі інвестыцыйных магчымасцяў Магілёўскай вобласці і правядзення змястоўнай дыскусіі па пытаннях развіцця міжнароднага супрацоўніцтва, – падкрэслілі суразмоўцы. – На гэтай пляцоўцы традыцыйна дасягаюцца пагадненні не толькі па актуальных пытаннях сацыяльна-эканамічнага развіцця рэгіёна, але і важныя дамоўленасці, заключаюцца ўзаемавыгадныя кантракты».

Падчас «Млына поспеху» запланавана правядзенне шэрагу мерапрыемстваў, у тым ліку праца некалькіх секцый, дзе прадставяць найлепшыя праекты, якія адлюстроўваюць інвестыцыйны і эканамічны патэнцыял Прыдняпроўскага краю. Іх адбор і афармленне будзе ажыццяўляцца пры садзейнічанні Нацыянальнага агенцтва інвестыцый і прыватызацыі Рэспублікі Беларусь, якое з’яўляецца дзяржаўнай арганізацыяй па прыцягненні прамых замежных інвестыцый у краіну.

Арганізатарам форуму з’яўляецца Магілёўскі абласны выканаўчы камітэт сумесна з ААТ «Магілёўскае агенцтва рэгіянальнага развіцця».