За выхадныя дні ў рэгіёне адбылося 7 пажараў, адзін скончыўся гібеллю чалавека. Пра гэта паведаміла старшы інспектар Цэнтра бяспекі жыццядзейнасці і ўзаемадзеяння з грамадскасцю Магілёўскага абласнога ўпраўлення МНС Вольга Нехарошых.

1 мая, каля поўначы, жыхароў аграгарадка Кадзіна Магілёўскага раёна разбудзіў трэск падпаленага дома. Палала жыллё, якое належала 64-гадоваму мясцоваму жыхару. Пра тое, што гаспадар можа знаходзіцца ўнутры, занепакоеныя суседзі паведамілі выратавальнікам. Падчас ліквідацыі ўзгарання горшыя меркаванні пацвердзіліся: на падлозе ў адным з пакояў без прыкмет жыцця быў знойдзены мужчына. Загінулы пражываў адзін.

Паводле папярэдніх дадзеных, фатальную ролю ва ўзнікненні пажару адыграла непатушаная цыгарэта. Праверку па факце пажару і гібелі праводзіць першае следчае аддзяленне Магілёўскага міжраённага аддзела следчага камітэта.