Жаночая каманда Магілёўскай вобласці па барацьбе заняла першае месца ў чэмпіянаце Беларусі.

Найбольш яркія схваткі ў складзе пераможцаў правялі Ксенія Станкевіч, якая ў фінальным паядынку вагавой катэгорыі да 48 кг аказалася мацнейшай за суперніцу з Рэчыцы Віялету Чырык, і Юлія Пісарэнка (60 кг), якая не пакінула шанцаў у фінале сваёй зямлячцы Надзеі Драгуновай.

Магіляўчанка Вераніка Іванова стала найлепшай у вагавай катэгорыі 63 кг, перамогшы ў фінале прадстаўніцу Мінскай вобласці Крысціну Федарашка.

На другой пазіцыі каманднага заліку размясцілася Гомельская вобласць, трэцяе месца дасталося камандзе Гродзенскага рэгіёна.

Лідары жаночай зборнай Беларусі па барацьбе Марыя Мамашук, Ванэса Каладзінская і Васіліса Марзалюк турнір, які прайшоў у спарткомплексе "Стайкі", прапусцілі.

У чэмпіянаце Беларусі па жаночай барацьбе прынялі ўдзел 70 спартсменак. Дадзены старт з’яўляецца адным з крытэрыяў адбору для ўдзелу ў чэмпіянаце свету, які пройдзе з 21 па 26 жніўня ў Парыжы.