Жыхароў горада на Дняпры запрашаюць да ўдзелу ў конкурсе праектаў «Мы – Магілёў». Галоўная мэта спаборніцтва – натхніць людзей на сумеснае самастойнае рашэнне сацыяльных праблем, палепшыць якасць жыцця ў абласным цэнтры, стварыць тое, чым можа ганарыцца Магілёў, адзначыў кіраўнік Цэнтра гарадскіх ініцыятыў Юрый Стукалаў.

Сферы праектаў, рэалізацыя якіх павінна быць разлічана на тры месяцы, могуць тычыцца экалогіі, стварэння ўмоў для паасобнага збору смецця, выкарыстаных элементаў харчавання, развіцця культуры, безбар’ернага асяроддзя, зон адпачынку і зялёных тэрыторый у жылых раёнах, правядзення гарадскіх святаў і інш.

Журы і жыхары Магілёва з дапамогай галасавання ў сацсетках выберуць 2 найлепшыя праекты, а Цэнтр гарадскіх ініцыятыў і партнёры акажуць практычную дапамогу ў ажыццяўленні ідэй.

Для ўдзелу неабходна запоўніць анкету да 10 студзеня (уключна) па спасылцы: https://goo.gl/6F9p7G. Па ўсіх пытаннях можна пісаць на адрас: cgimogilev@gmail.com. Партнёры праекта: кампанія «Рэкламатар», клуб «Бізнес Магілёў» і інфармацыйны праект Магілёў Live.

У межах конкурсу для ўсіх жадаючых арганізуюць бясплатны семінар па праектным менеджменце, дзе можна даведацца асновы рэалізацыі праекта і з дапамогай атрыманых ведаў дапрацаваць наяўную ідэю. Семінар адбудзецца 8 снежня. Пачатак у 12.00. Удзел па папярэдняй рэгістрацыі да 7 снежня па спасылцы: https://goo.gl/a6nDxr.