Жыхароў Магілёўскай вобласці заклікаюць падтрымаць штогадовую міжнародную акцыю «Дзень без аўтамабіля», якая пройдзе 22 верасня. Пра гэта карэспандэнту сайта паведамілі ў абласным камітэце прыродных рэсурсаў і аховы навакольнага асяроддзя.

Паводле слоў суразмоўцаў, мэта акцыі – прыцягнуць увагу грамадскасці да экалагічных праблем, нагадаць пра негатыўны ўплыў аўтатранспарту на навакольнае асяроддзе, у тым ліку на якасць паветра ў гарадах. Усім уладальнікам аўтамабіляў прапануецца ў гэты дзень абмежаваць выкарыстанне асабістага транспарту і пры неабходнасці карыстацца грамадскім.

У камітэце дадалі, што магілёўцы могуць падключыцца да Дня без аўтамабіля, стаўшы ўдзельнікамі велапрабегу. У названы дзень аматарам двухколавага транспарту прапануюць праехаць ад абласнога музея імя П. В. Масленікава да плошчы Славы. Старт запланаваны на 19.00. «Падтрымаць акцыю нароўні з навучэнцамі агульнаадукацыйных і спартыўных школ горада можа любы, хто любіць актыўны адпачынак і неабыякавы да экалагічных праблем», – падкрэслілі спецыялісты.

Пасля велапрабегу на аўтастаянцы каля Палаца культуры вобласці запланавана тэматычная акцыя «Пазнач сябе». Супрацоўнікі Дзяржаўтаінспекцыі правядуць інтэрактыўныя заняткі, дзе раскажуць пра тэхніку бяспекі і правілах перамяшчэння ў цёмны час сутак, выкарыстанні святлоадбівальных элементаў і інш.

Дарэчы, на час правядзення акцыі з 19.00 да 19.30 будзе перакрыта правая палова вуліцы Першамайскай у напрамку да плошчы Славы на ўчастку ад праспекта Міра да плошчы Славы.Упершыню акцыя «Дзень без аўтамабіля» прайшла ў французскім горадзе Ла Рашэль у 1997 годзе, а праз год гэту ініцыятыву падхапіла ўся краіна. У 1999 годзе да Францыі падключыліся Італія і Швейцарыя, пасля чаго ідэя правядзення Міжнароднага дня без аўтамабіля распаўсюдзілася на ўсю Еўропу. У 2000 годзе Еўрапейскай камісіяй па навакольным асяроддзі 22 верасня быў абвешчаны Міжнародным днём без аўтамабіля. У Беларусі акцыя праводзіцца з 2008 года.