Школа гарадскіх ініцыятыў «Цяпліца» аб’яўляе аб пачатку трэцяга сезона. Пра гэта карэспандэнту сайта паведаміў кіраўнік Цэнтра гарадскіх ініцыятыў Юрый Стукалаў.

Паводле слоў суразмоўцы, слоган праекта, які стартаваў два гады таму – «Для тых, хто хоча зрабіць жыццё ў Магілёве лепшым, але не ведае як». Выпускнікі першых сезонаў на справе паказалі, што гарадскому актывізму можна вучыцца і прымяняць навыкі на практыцы. Сярод «цяплічных» праектаў, якія ўпрыгожылі наш горад, – «Кінатэатр пад адкрытым небам», «Пазітыўныя знакі», «Вершы на сценах», «Сабака Чака». Акрамя таго, выпускнікі прымалі актыўны ўдзел у падрыхтоўцы і правядзенні такіх маштабных мерапрыемстваў, як «Дранікі-фэст», «Вялікі гарадскі пікнік».

У гэтым сезоне арганізатары вырашылі пашырыць меркаваную геаграфію слухачоў. «Раней мы запрашалі на заняткі толькі магілёўцаў, а ў гэтым годзе хочам паклікаць жыхароў і іншых гарадоў вобласці, – сказаў Юрый Стукалаў. – Калі ў чалавека будзе магчымасць перыядычна па суботах прыязджаць у Магілёў, мы не бачым ніякіх праблем. Магчыма, у новай «Цяпліцы» паспеюць цікавыя ідэі і для рэгіёнаў».

Як адзначыў кіраўнік цэнтра, «Цяпліца» – гэта не школа ў звыклым сэнсе, а серыя сустрэч і лекцый, якія дапамогуць неабыякавым людзям навучыцца быць больш ініцыятыўнымі і актыўнымі ўдзельнікамі гарадскога жыцця.

Заняткі ў «Цяпліцы» будуць праходзіць двойчы на месяц. Увесь курс будзе доўжыцца пяць месяцаў. Слухачам школы трэба будзе наведаць дзесяць заняткаў. Яны будуць прысвечаны таму, як прыдумваць і рэалізоўваць цікавыя праекты. Таксама ў праграме навучання запланаваны тэматычныя семінары, у якіх зможа прыняць удзел любы жадаючы. Лектарамі выступяць людзі з вялікім практычным вопытам у сваёй сферы.

Каб стаць навучэнцам «Цяпліцы», трэба да 29 лістапада ўключна запоўніць анкету-заяўку. Слухачы будуць адабраны арганізатарамі на конкурснай аснове. Удзел у праекце бясплатны. Па ўсіх дадатковых пытаннях можна звярнуцца на адрас: cgimogilev@gmail.com