«18 лютага 2018 года адбудуцца выбары дэпутатаў у мясцовыя Саветы дэпутатаў дваццаць восьмага склікання. Гэта важная палітычная падзея, ад вынікаў якой залежаць будучыня і стабільнасць у нашай краіне.

Перад намі стаіць галоўная задача – адкрыта выказаць сваю грамадзянскую пазіцыю і ажыццявіць справядлівы выбар народных абраннікаў у дэпутаты мясцовых Саветаў усіх узроўняў.

Неабходна абраць дэпутатамі найбольш ініцыятыўных і адказных грамадзян, якія шчыра імкнуцца зрабіць наша жыццё лепшым, якія ведаюць свой рэгіён і яго праблемы, гатовы прымаць актыўны ўдзел у яго развіцці і ўмацаванні аўтарытэту статусу дэпутата ў вачах выбаршчыкаў.

Мы спадзяёмся, што вы, паважаныя суайчыннікі, выявіце сваю выбарчую актыўнасць і прагаласуеце за кандыдатаў у дэпутаты, здольных вырашаць актуальныя задачы па рэалізацыі праграмы сацыяльна-эканамічнага развіцця вобласці.

Кіраўнікі грамадскіх арганізацый і палітычных партый Магілёўскай вобласці заклікаюць усіх выбаршчыкаў выканаць свой грамадзянскі абавязак і, кіруючыся пачуццём асабістай адказнасці, прыйсці на выбарчыя ўчасткі і абраць годных людзей дэпутатамі мясцовых Саветаў».

Зварот прыняты на пасяджэнні Каардынацыйнага савета грамадскіх аб’яднанняў і палітычных партый Магілёўскай вобласці.