Прадстаўнікі 24 беларускіх і 35 расійскіх гарадоў сабраліся на дзявятую сустрэчу гарадоў-пабрацімаў Беларусі і Расіі. Мерапрыемства праходзіць 30-31 сакавіка ў Магілёве. Форум сабраў больш за 170 удзельнікаў дзвюх дзяржаў. У абласны цэнтр прыбылі дэлегацыі з Масквы, Волагды, Тулы, Смаленска, Пскова, Вязьмы, Кастрамы, Валгаграда, Пензы, Жалезнагорска, Курска і іншых. Сустрэча гарадоў-пабрацімаў прымеркавана да дня яднання народаў Беларусі і Расіі, які адзначаецца 2 красавіка. Мерапрыемства накіравана на ўмацаванне міжрэгіянальных кантактаў, у тым ліку ў гандлёва-эканамічнай сферы, культуры. Асноўная яго тэма – эканамічнае супрацоўніцтва гарадоў-пабрацімаў, вопыт Магілёва і яго партнёраў па развіцці інтэграцыйных працэсаў.

Падчас сустрэчы дагавор аб парадненні падпісалі Шаркаўшчынскі раён Віцебскай вобласці Беларусі і Пскоўскі раён Пскоўскай вобласці Расіі. Подпісы пад дакументамі паставілі старшыня Шаркаўшчынскага райвыканкама Мікалай Баговіч і кіраўнік Пскоўскага раёна Уладзімір Лаўрэнаў.