У сёмы дзень XII Міжнароднага моладзевага тэатральнага форуму «M.@rt.контакт» гледачы ўбачылі шоу Брэмнера Дзьюці з Нью-Ёрка «'33 (Кабарэ)». Пастаноўка ішла на англійскай мове з субтытрамі. Артыст звярнуўся да гісторыі знакамітага берлінскага кабарэ «Эльдарада», дзе выступала Марлен Дзітрых і іншыя знакамітасці, а з прыходам да ўлады нацыстаў установа была закрыта.

Сярод руінаў кабарэ акцёр падае на прыцемненую сцэну. Калі падмосткі асвятляюцца, ён разумее, што застаўся адзін. Яго сябры і калегі зніклі – яны арыштаваны ўладамі, паўсюль толькі сапсаваны рэквізіт і парваныя касцюмы. Жадаючы пазбегнуць той жа долі і выжыць, акцёр збіраецца бегчы, знікнуць у ночы. Але вось скрозь зламаныя дзверы праслізгваюць гледачы: яны чакаюць шоу. Натхнёны, артыст грае для іх спектакль, узнаўляючы гульню кожнага са сваіх калег – камедыянта, танцоркі і іншых удзельнікаў трупы. Такім чынам ён, выкарыстоўваючы ўсе свае таленты, аддае даніну павагі зніклым сябрам.