Прэзідыум Савета Федэрацыі прафсаюзаў Беларусі прысудзіў прэміі 2017 года ў галіне працы з прысваеннем звання лаўрэата, уручэннем ганаровага знака, дыплома і грашовай узнагароды.

Самыя лепшыя былі названы ў шасці сферах: прамысловасць і будаўніцтва; энергетыка, транспарт і сувязь; ЖКГ, бытавое абслугоўванне, гандаль, лёгкая прамысловасць; АПК; сацыяльная сфера; хімічная, горная і нафтавая галіны прамысловасці. Акрамя таго, назвалі лаўрэатаў у намінацыі «За значны ўклад у развіццё сацыяльнага партнёрства». Прэміі прысуджаліся як асобным работнікам і кіраўнікам, так і цэлым калектывам і творчым групам.

З больш дзясятка намінантаў двое – прадстаўнікі Магілёўскай вобласці. Так, у сферы жыллёва-камунальнай гаспадаркі, бытавога абслугоўвання, гандлю, лёгкай прамысловасці прэмія прысуджана намесніку дырэктара Магілёўскага гарадскога камунальнага ўнітарнага прадпрыемства цеплаэнергетыкі Краўцову Міхаілу. Ён адзначаны ўзнагародай за вялікі асабісты ўклад у дасягненне высокіх паказчыкаў сацыяльна-эканамічнага развіцця, стварэнне належных умоў працы і быту работнікаў арганізацыі.

Таксама ў лік намінантаў прэміі за значны ўклад у развіццё сацыяльнага партнёрства ўвайшлі генеральны дырэктар РУВП «Магілёўаблгаз» Аляксей Кушнарэнка і старшыня аб’яднанай прафсаюзнай арганізацыі прадпрыемства Тамара Верамеенка.

Урачыстая цырымонія ўзнагароджання пераможцаў і ўручэння прэмій адбудзецца 1 мая 2017 года.