Спартакіяда стала дэманстрацыйнай пляцоўкай лепшых спартыўных дасягненняў школьнікаў. Такое меркаванне ў час адкрыцця фіналу XII Рэспубліканскай спартакіяды школьнікаў у Магілёве выказаў Міністр адукацыі Ігар Карпенка.

У цяперашніх спаборніцтвах, якія праходзяць у Магілёўскай вобласці з 8 па 23 чэрвеня, удзельнічае больш за 2,5 тыс. школьнікаў. «Форум – важная традыцыя сістэмы адукацыі, – падкрэсліў Ігар Карпенка. – Па ініцыятыве кіраўніка дзяржавы ў 2006 годзе быў дадзены новы старт рэспубліканскай спартакіядзе школьнікаў: з таго часу яна праводзіцца штогод і з’яўляецца маштабным дзіцячым спартыўным мерапрыемствам».

Міністр адукацыі выказаў упэўненасць, што падчас спаборніцтваў моладзь праявіць свае найлепшыя якасці, мужнасць і высакароднасць, сумленнасць і настойлівасць, волю да перамогі, але не любой цаной, а выконваючы спартыўныя прынцыпы сумленнай гульні. «Магчыма, хто-небудзь з удзельнікаў у будучыні падымецца на алімпійскі п’едэстал гонару, даб’ецца высокіх вынікаў, а каму спорт проста дапаможа вырасці годным грамадзянінам сваёй Айчыны», – сказаў Ігар Карпенка.

Ён нагадаў, што цяпер краіна актыўна вядзе падрыхтоўку да другіх Еўрапейскім гульняў, якія пройдуць у 2019 годзе ў Мінску. «Для нас гэта выдатная магчымасць даказаць, што беларусы – спартыўная нацыя, а для спартсменаў – добры шанец заявіць пра сябе», – адзначыў міністр.

XII Рэспубліканская спартакіяда школьнікаў праходзіць на спартыўных аб’ектах Магілёва, Бабруйска, Горак, Бялынічаў. Задзейнічаны пляцоўкі Барысава і Гомеля. У праграму ўключаны 21 летні від спорту, з іх 19 – алімпійскіх. Скончылася спаборніцтва па мастацкай гімнастыцы, баскетболе, вольнай барацьбе, скачках на батуце, шахматах, цяжкай атлетыцы, кулявой стральбе. Наперадзе вызначэнне пераможцаў у плаванні, грэка-рымскай барацьбе, дзюдо, спартыўнай гімнастыцы, боксе, настольным тэнісе, фехтаванні, веласпорце, валейболе, шашках, лёгкай атлетыцы, футболе, гандболе, веславанні на байдарках і каноэ.

Арганізатарамі мерапрыемства выступаюць Міністэрства адукацыі сумесна з Міністэрствам спорту і турызму і Магілёўскім абласным выканаўчым камітэтам. Галоўную судзейскую калегію фіналу спартакіяды ўзначальвае ўраджэнец Магілёва, алімпійскі чэмпіён 1992 года па веславанні на каноэ-двойцы Аляксандр Масяйкоў.