У магілёўскім спарткомплексе “Алімпіец” з 18 па19 мая праходзіць маштабная інфармацыйна-адукацыйная акцыя «Магілёўская вобласць – тэрыторыя здароўя». Праграмай мерапрыемства запланавана выстаўка-продаж тавараў і паслуг (спартыўных, турыстычных тавараў, прадуктаў харчавання, фармацэўтычнай прадукцыі, медыцынскай тэхнікі з мінімальнай гандлёвай надбаўкай і інш.), прэзентацыі інфармацыйна-адукацыйных матэрыялаў па фарміраванні здаровага ладу жыцця, а таксама навучанне аказанню першай медыцынскай дапамогі і азнаямленне з мерамі пажарнай бяспекі. На працягу двух дзён будзе працаваць міні-паліклініка, дзе кожны зможа атрымаць кансультацыю лекараў-спецыялістаў, памераць артэрыяльны ціск, зрабіць электракардыяграму і экспрэс-дыягностыку ўзроўню глюкозы ў крыві, вызначыць масу цела, даведацца пра свой рост, прайсці флюараграфічнае абследаванне і інш. Гасцей мерапрыемства таксама чакаюць майстар-класы па фітнэсе, вучэбна-трэніровачныя заняткі па тэнісе і многае іншае.