У Магілёве 27 чэрвеня ўрачыста здадзены ў эксплуатацыю першы ў рэгіёне пабудаваны за кітайскія сродкі сацыяльны дом. Новы дзесяціпавярховы будынак на 120 кватэр знаходзіцца ў мікрараёне Казіміраўка па вул. Грунвальдскай. Гэта адзін з трох дамоў, якія былі збудаваны ў Магілёўскай вобласці дзякуючы рэалізацыі першага этапа праекта «Будаўніцтва сацыяльнага жылля» з прыцягненнем тэхніка-эканамічнай дапамогі Кітайскай Народнай Рэспублікі. Жыць у доме будуць магілёўцы, якія маюць права на атрыманне сацыяльнага жылля: асобы з ліку дзяцей-сірот, якія засталіся без апекі бацькоў, сем’і, якія выхоўваюць дзяцей-інвалідаў, шматдзетныя сем’і, непрацуючыя адзінокія інваліды і грамадзяне з захворваннямі, пры наяўнасці якіх прызнаецца немагчымым сумеснае пражыванне з іншымі асобамі. У 1-2-пакаёвых кватэрах ўжо паклеены шпалеры, пакладзены ламінат, усталявана сантэхніка, дзверы. Добраўпарадкавана прылеглая тэрыторыя, дзе размясцілася выдатная дзіцячая пляцоўка.