У Магілёўскім раёне адзначаны на гнездаванні стэпавы лунь - від, які ў апошні раз гняздзіўся ў Беларусі 101 год таму, паведамілі ў грамадскай арганізацыі «Ахова птушак Бацькаўшчыны».

Фатограф-анімаліст з Магілёва Уладзімір Бондар у сярэдзіне ліпеня сфатаграфаваў самку стэпавага луня — надзвычай рэдкай для Беларусі птушкі, апошні даказаны выпадак гнездавання якой адзначаны ў нашай краіне ў 1916 годзе.

Луні — група драпежных птушак, якія гняздуюцца на зямлі. Памер еўрапейскай папуляцыі стэпавага луня ацэньваецца ўсяго ў 600-2140 пар. Від знік з гнездавання ў Румыніі, а таксама, як мяркуецца, ва Украіне і Малдове.