У Магілёўскай вобласці трохтысячны паказчык намалоту і перавозкі збожжа пераадолелі два экіпажы камбайнераў і два кіроўцы ЗАТ «Агракамбінат «Зара» (Магілёўскі раён).

Першымі ў рэгіёне 3 тыс. т ўраджаю сабралі старшы камбайнер Уладзімір Мельнікаў і камбайнер Аляксей Макосаў, а таксама экіпаж вядомай у раёне дынастыі камбайнераў бацькі і сына Корсакаў. Сярод кіроўцаў вызначыліся Юрый Манкевіч і Лангуры Хасія. Гэта другое значнае дасягненне працаўнікоў «Зары» ў гарачы час: у скарбонцы перамог – лідарства па намалоце і адвозцы 2 тыс. т. збожжа.

Ушанаванне перадавікоў адбылося з удзелам прадстаўнікоў Міністэрства сельскай гаспадаркі і харчавання, мясцовай выканаўчай улады, абкама і райкама прафсаюза работнікаў аграпрамысловага комплексу. Ім уручылі дыпломы, грашовыя прэміі, прафсаюзную атрыбутыку.

Паводле дадзеных на раніцу 14 жніўня, Магілёўская вобласць прыбрала з палёў больш за палову ўраджаю – 58%. У рэгіёне абмалочана 187 тыс. га культур. Сабрана 655 тыс. т. збожжа пры сярэдняй ураджайнасці 35 ц/га. Апошні паказчык на жніве-2017 вышэйшы за мінулагодні на 2,3 ц/га.

Па тэмпах ва ўборачнай лідзіруе Кіраўскі раён, дзе ўбрана 84% збожжавага кліну. Аграрыі Бабруйскага і Клічаўскага раёна абмалацілі па 75%, Асіповіцкага – 65%, Крычаўскага – 64%, Круглянскага – 63%. У цэлым практычна ўсе рэгіёны Магілёўскай вобласці перасягнулі 50-працэнтны паказчык па ўборцы збожжавых культур.

Па ўраджайнасці лепшыя вынікі дэманструюць хлебаробы Шклоўскага (52,5 ц/га), Круглянскага (48 ц/га) і Горацкага (40,7 ц/га) раёнаў.