Байцы магілёўскіх студэнцкіх атрадаў адправіліся сёння ў Клічаў. Хлопцы і дзяўчаты будуць дапамагаць прыводзіць у парадак сталіцу абласных «Дажынак-2017», як паведамілі карэспандэнту сайта ў абкаме ГА «БРСМ».

Паводле слоў суразмоўцаў, моладзь ўстановіць агароджы ў прыватным сектары па пер.Горкага. Актывісты таксама правядуць дэмантаж тратуарнай пліткі ў цэнтральным парку.

«Рады, што можам унесці невялікі ўклад у добраўпарадкаванне горада, які агульнымі намаганнямі становіцца больш прыгожым, набывае глянец, – адзначылі суразмоўцы. – Прычым гэта не апошні суботнік. Правядзенне яшчэ аднаго запланавана на самы блізкі час».

Абласны фестываль-кірмаш працаўнікоў вёскі «Дажынкі-2017» пройдзе ў Клічаве ў канцы верасня. Зараз у раённым цэнтры ідзе вялікі рамонт. Асноўныя сілы сканцэнтраваны на цэнтральнай плошчы, дзе будзе размяшчацца галоўная сцэна “Дажынак”. Вядзецца капітальны рамонт будынкаў Дома культуры і школы мастацтваў, пабудаваных у канцы 1940-х гадоў. Клічаўская ЖКГ пры падтрымцы жыхароў горада добраўпарадкоўвае гарадскі парк. Капітальна рамантуюць 13 жылых дамоў. Асфальтуюць вуліцы.