Цэнтральную вуліцу Клічава чакае рэканструкцыя. Да канца красавіка на плошчы 30-годдзя Перамогі пачнуць дэмантаж тратуарнай пліткі і бардзюрнага каменю, а поўнамаштабная будоўля ў самым сэрцы горада разгорнецца ўжо ў маі. Пра гэта паведаміў намеснік старшыні Клічаўскага райвыканкама па будаўніцтве і жыллёва-камунальнай гаспадарцы Ігар Панцялееў.

Паводле слоў суразмоўцы, будуць рэканструяваны будынкі дзіцячай школы мастацтваў і раённага Дома культуры. Унутры першага ўжо ідзе касметычны рамонт. Помнік Уладзіміру Леніну, як і меркавалася, устане паміж будынкамі аддзела адукацыі, спорту і турызму райвыканкама і дзіцячай школы мастацтваў, а мемарыяльны знак аднясуць да Дошкі гонару, якую таксама маюць намер абнавіць.

Пачаў паволі пераўтварацца гарадскі парк. Тут высадзілі каля 500 кустоў, больш за 50 саджанцаў чырвонага дуба і ліпавую алею. Праца па азеляненні працягнецца. Плануецца высадзіць яшчэ каля 100 туй. Бліжэй да лета месца адпачынку пачнуць упрыгожваць кветкавымі кампазіцыямі. З часам у парку памяняюць дарожкі і ўстановяць лаўкі. Памятны знак воінам-інтэрнацыяналістам, які раней збіраліся перанесці, хутчэй за ўсё застанецца на сваім месцы.

У дварах шматкватэрнай жылой забудовы пачынаюць прыбіраць гаспадарчыя пабудовы, узведзеныя з парушэннем закона.

Па матэрыяле газеты «Сцяг Саветаў»