Комплекс па вытворчасці феерверкаў плануецца пабудаваць у Магілёўскім раёне на тэрыторыі ў 600 га. Пра гэта расказаў в.а. дырэктара Магілёўскага агенцтва рэгіянальнага развіцця Яўген Якімаў.

З мэтай прапрацоўкі варыянтаў рэалізацыі дадзенага праекта Прыдняпроўскі край з двухдзённым візітам наведала дэлегацыя кітайскага горада Люян, на тэрыторыі якога размяшчаецца сусветна вядомая карпарацыя феерверкаў «Дунсін». Яна вырабляе больш за 80% сусветнага аб’ёму гэтай прадукцыі. Дарэчы, менавіта гэта карпарацыя падарыла Магілёву з нагоды яго 750-годдзя 30-хвілінны феерверк.

Падчас дзелавога візіту ў Магілёў кітайскі бок выказаў намер стварыць паблізу абласнога цэнтра комплекс, у склад якога ўвойдуць заводы, якія забяспечаць поўны цыкл стварэння феерверкаў – па вытворчасці пораху, вогнеправоднага шнура, абалонкі, упакоўкі, этыкеткі. Там жа плануецца размяшчэнне сацыяльнай інфраструктуры – грамадскага харчавання і інтэрнатаў для рабочага персаналу. Паводле папярэдніх разлікаў бізнес-плана комплекс забяспечыць працай каля 2,5 тыс. чалавек. Адміністрацыя СП будзе размяшчацца ў Магілёве. Для дадзеных мэт улады горада Магілёва прапанавалі кітайскім інвестарам свабодныя плошчы Тэхнапрыбора.

Па выніках праведзенай сустрэчы прынята рашэнне стварыць рабочую групу. У яе склад увойдуць зацікаўленыя прадстаўнікі розных ведамстваў Магілёва і Магілёўскага раёна, на тэрыторыі якога ў цяперашні час ідзе падбор пляцоўкі для будаўніцтва комплексу. Суправаджаць рэалізацыю гэтага праекта будзе Магілёўскае агенцтва рэгіянальнага развіцця.

Бакі таксама дамовіліся прапрацаваць тэхнічныя пытанні праекта да канца бягучага месяца, каб працягнуць яго дэталёвае абмеркаванне падчас візіту дэлегацыі Магілёўскай вобласці ў Кітай. Паездка запланавана на трэцюю дэкаду верасня.

mogilevnews.by