Папяровых галубоў міру запусціць у неба моладзь Магілёва. Флэшмоб, прысвечаны Міжнароднаму дню міру, адбудзецца сёння перад будынкам галоўнага корпуса Беларуска-Расійскага ўніверсітэта, як паведамілі ў галоўным упраўленні ідэалагічнай работы, культуры і па справах моладзі аблвыканкама.

“Больш за 30 велізарных шароў панясуць увысь беласнежных птушак, а студэнты прызавуць грамадскасць звярнуць увагу на важнасць умацавання дружалюбных сувязяў паміж народамі, нацыямі, краінамі, захавання міру на планеце”, – заўважылі суразмоўцы.

Маладзёжны флэшмоб стане часткай урачыстага збору «Адзіны час духоўнасці “Голуб міру”», які пройдзе на базе БРУ. У мерапрыемстве прымуць удзел прадстаўнікі органаў кіравання Беларусі і Расіі, грамадскіх аб’яднанняў, студэнты вышэйшых навучальных устаноў Магілёва. “Падчас урачыстага сходу яны абмяркуюць пытанні стварэння адзінай духоўнай прасторы ў брацкіх дзяржавах на аснове захавання памяці аб гуманістычных ідэях развіцця чалавецтва, якія ўвасобілі народы ў перамозе над фашызмам у Другой сусветнай і Вялікай Айчыннай войнах 1941-1945 гадоў”, – падкрэслілі спецыялісты. Людзі таксама наведаюць выставу работ дыпламантаў міжнароднага маладзёжнага конкурсу малюнкаў “Лета 1941: на мяжы міру і вайны”. Завершыць збор сустрэча студэнтаў з працаўнікамі дыпламатычнага прадстаўніцтва Расіі ў рэгіянальным офісе сацыяльна-культурнага грамадскага аб’яднання “Спадчына”.

Мерапрыемства, прымеркаванае да Міжнароднага дня міру, пройдзе і на адкрытай пляцоўцы каля Магілёўскага дзяржуніверсітэта харчавання. Гасцям прадставіцца магчымасць паўдзельнічаць у тэматычнай квэст-гульні і бліц-апытанні “Свет для мяне гэта ...!”. Тых, хто прыйшоў на свята, таксама чакае канцэрт мастацкай самадзейнасці і дэгустацыя страў нацыянальных кухняў.

“Сёння жыхары Магілёўскай вобласці скажуць сваё аднадушнае “не” вайне і “так” – міру”, – адзначылі ў галоўным упраўленні. У працоўных калектывах і навучальных установах паўсюдна адбудуцца асветніцкія мерапрыемствы: лекцыі, гутаркі, конкурсы, паказы фільмаў пра вайну. Будуць арганізаваны сустрэчы з ветэранамі і ўдзельнікамі Вялікай Айчыннай вайны, воінамі-інтэрнацыяналістамі. Мяркуецца, што ў храмах розных канфесій прагучаць малітвы за мір і ў памяць воінаў, а таксама пропаведзі пра ўклад кожнага чалавека ў справу захавання міру на зямлі і свяшчэннага дару жыцця. Традыцыйна прадстаўнікі Магілёўскага абласнога аддзялення ГА “Беларускі фонд міру” будуць уручаць мамам, якія нарадзілі немаўлят 21 верасня, спецыяльныя пасведчанні “Дзіця міру” і грашовыя падарункі.

Міжнародны дзень міру быў абвешчаны Генеральнай Асамблеяй ААН у 1981 годзе і адзначаўся ў кожную трэцюю суботу верасня. У 2001 годзе дату святкавання зацвердзілі на 21 верасня як дзень адмаўлення ад насілля і спынення агню. ААН прапанавала ўсім краінам і народам спыняць у гэты дзень ваенныя дзеянні ці адзначаць гэты дзень правядзеннем адукацыйных і грамадскіх інфармацыйных акцый па праблемах міру.